Jowai, Nohprah 22: Ka kynhun ïalehkai jong ka Lamin XI kala long syndon ka lahduh haka jingïakhun Final mynta ka lah sngi U Blei haka lynpung Amlarem Football League-2025 jong ka kyrdan ‘Super Division’ bala pynïaid da ka Amlarem Sub-Divisional Sports Association (ASSA) ha madan phutbol ka Jaraiñ West Jaiñtia Hills District.
Kane ka nam jop kala wan hadien ba ka Lamin XI kala lah ban pynliem da 5-4 kol ïa ka Amlarem Social Club lyngba ka jingïashut Tie-Breaker bad ka Lamin XI kala long syndon ka lahduh mynta u snem 2025.
Hashwa ban poi ka jingïashut Tie Breaker kine ki ar kynhun kila ïakhaid da mar shikol (1-1), ïa ka kol naka Lamin XI la ïoh ban thep nyngkong haka kylla step jong ka minute kaba 35 da u Genial Lamin ba phong ïa ka Jersey No-10 bad hadien katto katne minute ka Amlarem Social Club kala ïoh ban pynphai kylla haka minute kaba 42 da u Pusonbha Rymbui uba phong ïa ka Jersey No-10. Haduh ba kut ka 90 minut bad la rah noh sha ka extra time bad hadien ba la kut ka extra time ym don shuh ba thep kumta u referee ula rah shaduh ka Tie-Breker.
Ïa kane ka jingïakhun Final la wan ban pynhap pyrda da u kongsan u ma Wailadmiki Shylla uba dei ruh u Myntri ka kam ïalehkai Sports bad ka koit ka khiah jong ka jylla, ha ryngkat ka jingïadon lang u Local MLA jong ka Amlarem Constituency uba dei u Myntri ka tnad pule puthi u ma Lahkmen Rymbui bad kumjuh ruh ki riew rangbah jong ka thaiñ, ki nongkitkam ka ASSA bad ki paidbah kiba la wan sakhi ïa kane ka Final.
Ha kane ka lympung ïa ka nam Best Goal Keeper la ïoh rah da u Graham Dkhar jong ka Lamin XI, ïa ka nam Top Scorer la ïoh da u Marshial Nongrum jong ka Amlarem Social Club bad ïa ka nam Man of the Match la ïoh rah da u Denzil kongwang jong ka Lamin XI.
