Lahduh ka Kyntimon Marweiñ bad Pholendro Singh, ka Kong Kmoiñ Wahlang ïa ka khusnam ba kyrpang

Shillong, Jylliew 26: Ka samla Kyntimon Marweiñ bad u N Pholendro Singh ki la long ki lahduh ha ka jingïakop mareh Shillong 10K Run kaba dei ka sien pynlong kaba lai ba la pynlong da ka Meghalaya State Olympic Association (MSOA) ha ka sngi Saitjaiñ jong ka taïew ba lah dep. Ha katei ka jingïakop mareh la wan ban ïashim bynta da 700 ngut ki nongïamreh kaba la sdang bad pynkut ha JN Sports Complex Polo.
La pynlong ïa katei ka jingïakop mareh kum shi bynta ban rakhe ïa ka International Olympic Day, kaba la ju rakhe manla u snem ha ka 23 tarik Jylliew kaba dei ruh shi bynta ka jingkynmaw ïa ka jingsdang jong ka International Olympic Committee ha u snem 2894. Ïa katei ka jingïakop mareh ba 10 km la pynlong ha kylleng ka pyrthei ha katei ka sngi Saitjaiñ.
U N Pholendro Singh u la pyndep ha ka kyrdan ba nyngkong ha ka por 32 minint 21 second ha ka jingïamareh kaba ïakhaid bha da kaba tam ïa u Hepstarly Lyngkhoi (32:23) uba wan kyrdan ba ar bad ïa u Wolbetstar Nongsiej (32:24) ha ka kyrdan ba lai. Katba ha ka liang ki kynthei ka Kyntimon Marweiñ kaba la pyndep ka jingmareh da 41 minit 15 second kaba la tam ïa ka Marqueenless Ramsiej (42:20) bad ïa ka Bandasharai Marwein (44:06) kiba wan ha ka kyrdan ba ar bad ba lai.
Kitei kiba la jop kyrdan ba nyngkong ki la ïoh pdiang ruh ïa ka khusnam song pisa kaba mar 10,000 marwei, 7,000 kiba wan kyrdan ba ar bad 5,000 kiba wan ha ka kyrdan ba lai. La sam ruh ïa ki Consolation prize ba mar 1,000 marwei kiba la pyndep ha ka kyrdan ba saw haduh kyrdan ba phra.
La sam ruh ïa ki khusnam kyrpang na bynta ki nongïamareh kiba la 50 snem shajrong, ha kaba ka Kong Kmoin Wahlang kaba la khur ïa katei ka khusnam. Ka Kong Kmoin Wahlang kaba la 74 snem ka rta kadei kawei na ki longkmie kaba la ai mynsiem bad ka jingsarong ïa ka jylla hi baroh kawei hadien ba ka la leit ban ïashim bynta ha ka Mumbai Marathon ha ka sien kaba nyngkong eh ha u snem 2019 bad ka la ju ïashim bynta ha kiba bun ki jingïakop mareh hapoh ka jylla bad kumjuh ruh ha kylleng ki jylla jong ka ri India. Ha ka Shillong 10K Run ka Kong Kmoin Wahlang ka la pyndep ha ka por 57 minit 16 second, da kaba tam ïa ka Kong Melina Nonglang (1:02:40) kaba la 54 snem ka rta bad ïa ka Trisina Wanñiang (1:05:24) kaba 55 snem ka rta.
Ha ka liang ki shynrang pat, u Bah Swonding Mawlong uba 57 snem ka rta u la khur ïa ka khusnam kyrpang da kaba pyndep ha ka por (40:54) bad u Badon Singh Tham ba 50 snem ka rta uba la pyndep ha ka por (40:55), katba u Bah Pynshngaiñlang Dkhar uba 50 snem ka rta u la pyndep ha ka por 41:25.
Hadien ba la kut ka jingïakop mareh, ka MSOA ka la plie ruh ïa ka ophis treikam kaba thymmai kaba don ha Polo ïa kaba la khap ïa u ribon da u Bah John F Kharshiing uba dei u Working President ka MSOA ha ryngkat lang u Bah Bor Diengdoh vice president bad ka Kong Matsiewdor War Nongbri.
Ha katei kajuh ka sngi, la pynkup burom ruh ïa ki phra ngut ki dkhot jong ki state sports association kiba la shah jied ban long dkhot sha ka national federation. Kitei ki phra ngut ki kynthup ïa u Bah John F Kharshiing (Vice-President jong ka National Rifle Association of India), Paia B War Nongbri (Vice-President ka Archery Federation of India), Finely L Pariat (Association Vice-President jong ka Athletics Federation of India), Larry Kharpran (Joint Secretary jong ka Boxing Federation of India), Pynbianglang Laloo (Executive Member jong ka Badminton Association of India), Donny Ranee (Executive Member jong ka Wushu Association of India), Gaurav Bajaj (Member jong ka Governing Council ka Indian Golf Union) bad u Bah Neil Sootinck (Member jong ka Governing Body ka National Rifle Association of India). La pynkup burom ruh ïa u Bah Bor Diengdoh kum u senior Vice-President jong ka MSOA bad ruh ïa u synñiang u bynhei na bynta ka football hapoh ka ri India ha kiba bun ki snem.
Ka sorkar jylla ka la ai jingïarap ruh ïa baroh ki state association kiba la pynïasoh sha ka MSOA da ka song pisa ba 3 lak tyngka khnang ba kin ïoh ban pynlong ïa kiba bun ki lympung ïalehkai ban pynpaw nam ïa ki jait jingïalehkai kiba pher bapher.