Shillong, Jylliew 29 : Ka Khliehriat Higher Secondary School ka la ïoh rah ïa ka nam lahduh ha ka U-17 (Girls) jong ka lympung ïalehkai District Level Inter School Subroto Cup Football Tournament 2022 ba pynïaid da ka ophis District Sports Officer ka East Jaitia Hills District, katba ka Le Shnong Upper Primary School bad ka Wapung Higher Secondary School ha ka kyrdan U-14 (Boyrs) bad U-17 (Boys).
Ha ka jingïakhun final kaba la long ha ka sngi Balang ha Wapung Skur ha ka U-17 jong ki kynthei, ka Khliehriat Higher Secondary School ka la ïohrah nam lahduh da kaba pynliem da 1-0 ïa ka Dkhiah East Secondary School. Ka Le Shnong Upper Primary School ka la pynliem da ka tie breaker da 3-1 ïa ka Byndihati Secondary School hadien ba ki la ïakhaid da kaba thep mar ar kol ha ka U-14 jong ki shynrang.
Katba ka Wapung Higher Secondary School ka la pynliem da 1-0 pyrshah ïa ka Khlieriat Presbyterian Higher Secondary School ha ka U-17 jong ki shynrang. Ha kaba kut jong ka jingïalehkai nalor ka trophy nam lahduh la sam ruh ïa ki khusnam kum ka nam Best Player.
Ha ka U-17 jong ki kynthei ïa ka nam Best Player la ïoh da ka Amithies Ramvulmoii jong ka Dkhiah East Secondary School, ha ka U-14 ki khynnah shynrang ïa ka nam Best Player la ïoh da u Malki Dkhar katba ha ka U-17 ki shynrang la ïoh da u Amassjune Phawa.
Ha kane ka sngi la wan ban sakhi lang ruh u Bah Kyrmen Shylla uba la long kum u Kongsan uba la aiti ruh ïa ki trophy nam lahduh ha ka jingïadonlang u Agpal Singh Dhanoa IPS, Superintendent of Police ka East Jaiñtia Hills kum u symbud kongsan. La don lang ruh u ki rangbah shnong jong ka shnong Deinchynrum, Wapung bad kiwei kiwei ki riew rangbah.
