Jowai, Ïaïong 11: Ka kynhun ïalehkai jong ka Iong-i FC kala ïoh rah ïa ka nam lahduh haka 4th Knockout Football Tournament 2026 bala pynïaid da ka Teen Rocker Club Padu ha madan phutbol ka Paduhbah West Jaiñtia Hills District.
Kane ka jingjop jong ka Iong-i FC ka long hadien ba kala lah ban pynliem da 1-0 kol ïaka Pdengkarong SC haka jingïakhun phainal mynta ka sngi saitjaiñ 11 tarik u Ïaïong, 2026.
Ha kane ka sngi na ka liang u Arbor Hima Darnei ex MDC-Saipung kumjuh u Ex Chaiman ka JHADC u long kum u kongsan, haka jingdonlang u Reachingson Kongwang Secretary ka NPP Block Amlarem kum u symbud kongsan.
Ïa katei ka shikol na ka Iong-i la thep da u Samborlang Lato uba phong ïa ka Jersey No-8 bad ïoh ruh syndon ïaka nam Player of the Match, ïa ka nam best Goal Keeper la ïoh da u Kyrshanlang Kharjana naka Iong-I FC.
La sam ruh ïa ki khusnam sha ka lahduh jong kane ka lympung ka Iong-i FC kaba la ïoh rong da ka song pisa kaba 1,10,000/- tyngka bad ka kynhun Pdengkarong SC kala ïoh 60,000/- hajar tyngka.
