SHILLONG, Rymphang 16: Ka kynhun ïalehkai jong ka East Khasi Hills District ka la ïohrah ïa ka nam lahduh ha ka sienjam kaba lai (3rd) jong ka lympung Meghalaya Sqay Championship 2026.
ïa kane ka Championship la pynlong da ka All Meghalaya Sqay Association (AMSA), bad la pynlong ïa ka ar sngi lynter naduh ka 13 bad 14 tarik u Rymphang, 2026 hapoh jong ka Meghalaya School of Martial Arts (MSMA) Trainning Center, ha Laitkor Kynton-U-Mon.
Khyndiat ha kaba ïadei bad ka jingïalehkai Sqay, kadei ka dei ka rukom ïalehkai hyndai jong ka thaiñ South Asia kaba mih na Kashmir, la pynpaw da ka jingïaleh da ki tiar da kaba pyndonkam ïa ka waitlam kaba kyrpang kaba don tang kawei ka tduh (Tora) bad ka jingda (Bergula). Nalor kine ki tiar ki nongïalehkai ki lah ruh ban pyntreikam ïa ka buit ïakhun da kaba pyndonkam ïa ki kjat bad ki kti ban ïa aireng.
Haba phai biang pat sha ka Meghalaya Sqay Championship 2026, watla kadei ka sienjam kaba lai hynrei ka la ïohi ïa ka jingïashim bynta kumba 80 ngut ki nongïalehkai jong ki District bapher bapher.
Kumba la kdew, ïa ka nam lahduh ne ka Team Champion la ïoh rah da ka East Khasi Hills
District bad bud sa ka East Jaintia Hills District ha ka kyrdan ba ar (Runner.s-Up), nangta ka West Khasi Hills District ka la wan ha ka kyrdan ba lai.
Ha ka sngi pynkut la wan kongsan da u Bah Donny Raphael Ranee, Nong Seng ïa ka Meghalaya School of Martial Arts (MSMA), ha kaba u la kyrkhu kyrdoh bad ai mynsiem ïa baroh ki nongïashim bynta ba ki dei ban trei shitom bad buh ïa ka thong ha ka jingïaid lynti jong ki khnang ba kan long ka burom ym tang ïa ki hynrei ïa ka jaidbynriew, ïa ka Jylla bad ka Ri India hi baroh kawei.
Ka kong Merilin Warjri ka General Secretary ka AMSA ka la pyntip ruh ba baroh ki nong jop ha kane ka 3rd Meghalaya Sqay Championship 2026 ki lah shah jied lypa ban leit shimbynta sha ka National Sqay Championship 2026 ka ban sa long shen ha u bnai Jymmang ha Goa.
