SHILLONG, Nailur 27: Ka Meghalaya Wushu Association (MWA) hapoh ka jingpeit jong ka Wushu Association of India (WAI) ka la ïoh ban pynlong ïa ka 22nd Meghalaya Wushu Championship 2025 kaba jop bad kaba seisoh, ha kaba la sakhi ïa ka jingwan ïashim bynta haduh 400 ngut ki nongïalehkai kynthup ïa ki Officials bad ki Volunteer jong ki 9 tylli ki District hapoh ka jylla.
Kane ka lympung ka la ïaid ar sngi lynter naduh ka 19 haduh ka 20 tarik Nailur, 2025 ha Indoor Sport Hall, Polo, Shillong. Ki 9 tylli ki Districts kiba la wan ïashim bynta ha kane ka Championship ki kynthup ïa ka East Khasi Hills, West Khasi Hills, East Jaintia Hills, West Jaintia Hills, Eastern West Khasi Hills, Ri-Bhoi , West Garo Hills , South Garo Hills bad ka South West Khasi Hills.
ïa kane ka lympung la wan plie pyrda da u Bah Seibor Warbah MDC, VPP na Mawkynrew Constituency kum u Kongsan, ha ka 19 tarik Nailur, 2025 (Sngi Thohdieng) bad la wan pynhap pyrda noh da u Bah John F.Kharshiing, President jong ka Meghalaya State Olympic Association (MSOA) ha ka janmiet jong ka 20 tarik Nailur, 2025 (Sngi Saitjaiñ).
Ha kaba kut jong kane ka Championship ka kynhun ki nongïalehkai jong ka East Khasi Hills District ka la mih paw kum ka lahduh ban rah ïa ka ‘Champion Trophy’. Ha ka kyrdan ba ar (1st Runner) la wan bud sa ka West Jaintia Hills District, katba ha ka kyrdan ba lai (2nd Runner) la khur da ka Ri Bhoi District.
Ka jingthmu jong kane ka Championship ba la pynlong da ka MWA ka long ban jied ïa ki nongïalehkai Wushu kiba kynsai tam bad baroh ki nongjop kin ïoh ban shim bynta ha ka kylla ba nyngkong (1st phase) jong ka prokram ai jinghikai (coaching camp) ka ban long na ka bynta 1 bnai. Kane ka prokram ai jinghikai kan sdang naduh une u bnai Nailur haduh u Risaw, 2025 ha MSMA Training Center.
Kane ka prokram ka don jingïadei ruh bad ka jingpynkhreh jong ka kynhun ki nongialehkai Wushu ka jylla na ka bynta ka lympung ha Sanda bad Toalu, bad ha kajuh ka por ban pynkhreh ïa ka 39th National Games ka ban sa pynlong da ka jylla Meghalaya ha u snem 2027.
