SHILLONG, Risaw 19: Ka HYC Mawphlang Unit ha ka sngi Saitjaiñ, 18 tarik Risaw 2025, ka la ïoh ban pynhap pyrda noh ïa ka ‘Mawphlang Inter Dong Football (Knock out) Tournament’ ha madan Mawlyngkdop, ha kaba ka kynhun ïalehkai jong ka Dongiewrim FC ka la ïoh ban rah ïa ka nam lahduh da kaba pynliem noh ïa ka Mawkohmon FC ha ka jingïakhun phainal.
Kane ka lympung ka la ïohi ïa ka jingwan shim bynta jong 8 tylli ki kynhun kiba dei napoh ki kyntoit kiba hap hapoh ka shnong Mawphlang.
Shuwa ban sdang ïa ka jingïakhun la ïoh ban pynlong ïa ka Program kaba lyngkot ba la pynïaid da u President ka Unit Bah Bijoylin Nongrang.
Ha ka sngi pynhap pyrda la wan Kongsan da u Bah Donboklang Kharlyngdoh Vice President HYC ryngkat u Rangbah Shnong ka Mawkaton Bah Stadbor Blah kum u Symbud Kongsan. Kiba la wan pynshit pynshngaiñ lang ha kane ka sngi ki kynthup ïa ki dkhot ka HYC Mawphlang- Mawsynram Zone hapoh ka jingïalam u Bah Bhabok Sohshang kum u President, u Bakhraw jong ka Hima Mawphlang, Bah Dilip Wankhar.
Haba ai jingkren, na ka liang jong u Bah Stadbor Blah u la ai jingïaroh ïa ka Mawphlang Unit ba ka la lah ban lum ban lang ïa ki khynnah samla jong ka shnong lyngba kane ka lympung khnang ba kin beh sha ka Sports kaba long ka jingmyntoi ïa ka koit ka khiah.
Kumjuh ruh, na ka liang jong u Bah Donboklang Kharlyngdoh, u la ong ba hadien ba la ïoh jingtip na ïing Dorbar thaw aiñ ba ka jylla ka kiew sted ka jingdon jong ki samla kiba la kyrni ha u drok ka la poi haduh 3 lak ngut ha u snem 2024, ka seng kmie ka la bthah ïa ki shnat treikam ban lum ban lang ïa ki khun samla da ki lympung ïalehkai bad da ka jingpynlong ïa ki prokram pynsngewthuh bapher bapher, bad u la pyrto ïa ka Mawphlang Unit ba ka la shimkhia ban pynlong ïa kane ka Tournament hapoh la ka shnong.
U la pynpaw ba naduh ba ka seng ka la mih shakhmat ban ïakhun pyrshah ïa u drok ka la lap shibun ki jingjia kiba khyllah bad kiba sngew shyrkhei ki la wan jia ha ka jaidbynriew khasi, ki don ruh ki ïing ba ka kmie ka hap ban dkhat jubor la ka jingim tang namar ba u khun u la dawa pisa bai drok na ka borabor.
Haba kren shaphang ka phutbol u la ong, “Ka jingpawnam ka kyrteng Maradona, Pele, Neymar, Ronaldo bad Messi dei namar ka jingtreishitom ka jong ki hi”, kumta u la kyntu ïa ki khynnah samla ba ki dei ban don ka mynsiem trei shitom lada ki kwah ban kiew shaphrang.
Shuwa ban sdang ka jingïalehkai u la kyntu ïa baroh ar tylli ki kynhun, ka Mawkohmon FC bad ka Dongiewrim FC, ba kin pyni ïa ka jingïalehkai kaba itynnad da kaba ïa map ïa klet lada don kano kano ka jingbakla ha madan ïalehkai.
Haba phai pat sha ka phainal, ka jingïakhun ka la long kaba itynnad bad kaba ïaryngkat bor hynrei ka kylla step ka la kut khlem da don nonglah ban pynkhihjar. Dei hadien ba wanphai na ka por shongthait ba ka jingïalehkai ka la sdang ban khie im ha kaba ka Mawkohmon FC ka la ïoh lamkhmat lyngba ka kol jong u Khrawkupar Ryntathiang.
Hynrei ka Dongiewrim FC kam shym la kynran dien satia tad haduh ba kan da ïoh ban pynïakhaid lyngba u Kevinson Rynjah, nangta hashwa ban kut ka por u Chaster Mukhroh u la pynbud ïa ka kol kaba ar, kaba la pynlong ïa ka Dongiewrim ban jop da 2-1 kol ïa ka Mawkohmon FC.
U kongsan bad u symbud kongsan ki la sam ïa ki khusnam sha kine ki ar tylli ki kynhun kiba ïakhun ïa ka final, ha kaba ka Dongiewrim FC kum ka Lahduh (Champion Team) ka la ïohpdiang ïa ka trophy ryngkat ka song pisa ba T.15000/-, katba ka Mawkohmon FC kum ka Runner up ka la ïoh pdiang ïa ka Trophy bad ka khusnam pisa ba T8000/-.
La pynwai ïa ka jin da ka jingaikhublei na u President ka Mawphlang unit uba la ai mynsiem ia baroh ki team kiba la shim bynta bad u la kular ruh ban sa pynlong biang lashem snem ia kum kane ka Tournament.
