Khliehriat, Nailur 16: Ka East Jaiñtia Hills District Football Association (EJHDFA) ha ka sngi Balang (16 tarik Risaw, 2024) kala pynhap pyrda noh ïa ar tylli ki lympung ïalehkai phutbol, kata ïa ka kyrdan Third Division bad ka Second Division hadien ba la pyndep baroh ar tylli ki jingïakhun final bala pynlong ha madan Artificial Turf, Diengshynrum, kaba ha Khliehriat.
Haba phai sha ka jingïakhun phainal ba nyngkong ha ka kyrdan “Third Division” ka kynhun ïalehkai jong ka Dkhiah West SC kala jop da shikol 1-0 ïaka Lumshnong YWSC. ïa kane ka namtam la thep da u Nevermind Kya haka minit kaba 34 bad pynlong syndon ïa ka Dkhiah West SC ban long ka lahduh.
Haba phai sha ka jingïakhun phainal jong ka kyrdan “Second Division” ka kynhun ïalehkai jong ka Musniang SC kala pynliem da 3-1 kol ïaka Sutnga Mission SSCC. U Mardi Rymbai u la ai mynsiem ïa ka Musniang SC da kaba pynkhih ar kol, kiba la wan haka minit ba 23 bad 69, nangta ka kol na u Fourki Rymbai haka minit ba 74. Katba ïa ka shikol na ka Sutnga Mission SSCC la thep da u Interest Pajuh haka minit ba 32.
Ïa ka phainal jong kine ki ar tylli ki kyrdan la wan pynhap pyrda da u ma Rudion Roland Kyndait kum u kongsan bad u ma Daiapher Lamare kum u symbud kongsan ha ka jingdon ryngkatlang ki Waheh Shnong jong ki shnong bapher hapoh District, ki riew paw khmat ka District bad ki nongkitkam na ki Club/Association lem bad ki Dkhot jong ka EJHDFA.
Ha ka 3rd Division ïa ka nam Player of the Match la ïoh rah da u Justin Niang na ka Lumshnong YWSC, Player of the Tournament la ïoh da u Coming Dkhar na ka Tuberkmai Shnong, ïa ka nam Goalkeeper of the Tournament la ïoh da u Wadphang Phawa na ka Dkhiah West SC. Ïa ka nam Top Scorer la ïoh da u Gradely Mylliem naka Ratacherra CSC uba la ïoh thep haduh 10 kol. Katba ïa ka nam Best team la ïoh da ka Khliehriat East YWSC.
Ha ka 2nd Division ïa ka nam Player of the Match la ïoh da u Mardi Rymbai na ka Musniang SC, Player of the Tournament la ïoh da u Heimonmi Dkhar naka Musniang SC, Goalkeeper of the Tournament la ïoh da u Commander Bareh naka Lad Rymbai Dongwah SC, Top Scorer la ïoh da u Obadaia Bareh uba la thep 6 kol. Katba ïa ka nam Best team la ïoh da ka Musniang SC.
