Shillong, Nohprah 21: Ka kynhun ïalehkai kriket jong ka Combine XI Laban Pyllun ka la kylla long ka lahduh jong ka lympung 3rd Maitshaphrang Khasi League T20 Cricket Tournament 2025 hadien ba la lah ban pynliem noh ïa ka Rangkynsai Cricket Club da 4 wicket ha ka jingïakhun final kaba la long ha ka 20 tarik Nohprah, 2025 ka sngi Saitjaiñ.
ïa kane ka lympung la pynïaid da ka Khasi Student Union ryngkat ka jingïasnohktilang bad ka synjuk kriket ka jylla, ka Meghalaya Cricket Association, bad la pynlong ïa ka ha madan kriket ka MCA ha Polo, Shillong.
Haba shimti ïa ka pali ban tied nyngkong ka Rangkynsai ka la kamai 116 ron bad hap 6 wicket haduh kaba kut jong ka 20 ober. Haba jubab ka Combine XI Laban Pyllun ka la lah ban poi sha ka thong tang ha ka over ba 17 ban kamai 117 ron bad hap 6 wicket, kaba la pynskhem ïa ka jingjop da 4 wicket.
Ha ka jingïalang sam khusnam u Shavian P. Blah na ka Rangkynsai Cricket Club u la ïoh khur ïa ka nam ‘Player of The Series’ hadien ba u la lah ban kamai 318 ron bad ïoh khur 8 wiket ha baroh kawei ki jingïalehkai ha kane ka lympung, katba ïa ka nam Man of the Match la ïoh da u Erich Lyngdoh uba la lah ban kamai 38 run bad ïoh khur 1 wiket ha ka final.
Kiwei pat ki rangialehkai kiba ïoh khur ïa ki khusnam ha kane ka lympung ki long u Nathaniel Pyngrope jong ka Donkins Cricket Club uba la ïohpdiang ïa ka nam Best Under-19 hadien ba u la lah ban pynhap 5 wiket.
Kumjuh ruh, u Shavian P. Blah nalor ba u la khur ïa ka nam Best Under-23 u la bynrap sa kawei ka khusnam kum u nongtied ba kamai bun ron tam lane ‘Highest Run Scorer’ na ka bynta 318 ron kiba u la kamai ha baroh kawei ka lympung, katba u Charm Marbaniang na ka Rangkynsai Cricket Club u la ïoh ïa ka nam Highest Wicket Taker da kaba khur haduh 15 wiket.
Ha kane ka sngi la sam ïa ki khusnam da u Myntri ka tnat Sports and Youth Affairs ka Sorkar Jylla u Bah Wailadmiki Shylla uba la long kum u kongsan ryngkat ka jingsakhi lang jong ki nongïalam ka Khasi Students Union, ki nongkitkam jong ka Meghalaya Cricket Association bad ka Shillong Cricket Association kynthup ruh ki rangbah shnong na ki shnong kiba don hapoh ka jylli jong ka sor Shillong.
