Lahduh ka Anderson HSS bad ka Sibsing Memorial HSS ha ka 16th District Open cum Inter-School Badminton
Nongstoin, Naitung 24: Ka West Khasi Hills District Badminton Association [WKHDBA] ka la pynhap pyrda noh ïa ka lympung ïalehkai Badminton kaba la tip da ka 16th District Open cum Inter-School Badminton Tournament 2025 ha ka sngi Balang (23 tarik Naitung, 2025) ha kaba ka Anderson Higher Secondary School ka la rah ïa ka nam lahduh ha ka liang ki shynrang (Team Event), katba ka Sibsing Memorial Higher Secondary School ka la rah ha ka liang ki kynthei.
Ha ka jingïalang pynhap pyrda la wan Kongsan da u Bikram R Marak Superintendant of Police jong ka West Khasi Hills ha ka jingïadonlang ki dkhot nongkitkam jong ka WKHDBA.
Kane ka lympung ïalehkai kaba lai sngi lynter ka la sdang naduh ka 21 tarik haduh ka 23 tarik Naitung, 2025, bad la pynlong ïa ka ha Indoor Stadium, Nongstoiñ.
Nalor ka Team Event, u Nifty Develson Momin u la jop ha ka U-13 Singles jong ki shynrang, katba ka Alvareen Lyngdoh ka la jop ha ka liang ki kynthei.
U Rayden Danley u la jop ha ka kyrdan ïakhun U-15 ba marwei jong ki shynrang, katba ka Ilapynhun Dkhar ka la jop na ka liang ki kynthei.
Ha ka U-15 Boys Doubles la jop da u Rayden Danley Syiem ryngkat u Wanshan Lyngdoh Nonglait.
U Nangteibor Nonglang bad ka Wanridaphi Tympuin ki la jop ha ka kyrdan ïakhun U-17 ba marwei jong ki shynrang bad kynthei.
ïa ka namjop ha ka kyrdan ïakhun U-19 ba marwei jong ki shynrang la jop da u Banshanlang Parïong. Ka U-19 Mixed Doubles la rah da u Banshanlang Parïong bad ka Saphilinda Lyngdoh Nonglait.
U Ardor Marbaniang u la rah ïa ka namjop ha ka Men’s Singles, katba ka Barisuk Shyrkon ka la jop ha ka liang ki kynthei.
Ha ka Men’s Doubles la jop da u Ardor Marbaniang bad u Ryngkatdor Marbaniang, katba ka Barisuk Shyrkon bad ka Ibalapyntngen Shyrkon ki la jop ha ka liang ki kynthei.
Ha ka Mixed Doubles la rah da u Hubert Kharbani bad ka Wandashisha Lyngdoh.
ïa ka nam Most Promising Player la khur da u Donfar Nongsiej ha ka liang ki shynrang, nangta ka Faustina Wahlang Pahsyntiew ka la khur ïa kane ka khusnam ha ka liang ki kynthei.