Shillong, Nailur 14: Ka kynhun ïalehkai AG Meghalaya Futsal Team ka la ïohrah ïa ka namlahduh ha ka ‘Big FM’s Big Futsal Fest’, ka lympung ïalehkai futsal Inter Office kaba nyngkong ha nongbah Shillong. ïa kane ka nam kum ka lahduh ka la ïohrah ha Thrive Sports Arena, Langkydring hadien ba ka la pynliem noh ïa ka kynhun kaba shlur jong ka Meghalaya Secretariat Home Guards (MSHG) da 6-1 kol.
Lah ban kdew ba ka kynhun nongjop ka la lah ban wanrah ïa ka rukom ïalehkai kaba itynnat da ka jingdon jong katto katne ki player ba la mih madan teng ha ka I League bad kiba dang ïakhun ruh ha ka Shillong Premier League.
Watla kata ruh, na ka liang jong ka MSHG ka la durut bha haba sdang jong kane ka jingïalehkai bad ïoh katto katne ki kabu hynrei ha kaba khadduh ka jingtbit jong ka AG Meghalaya ka la sdang ban paw.
Sa shi sien pat u Sheen Sohktung u la lah ban ïarap ïa ka kynhun da kaba pynkhih 2 kol katba u paralok ba mih madanlang, u Rustomwell Khriam u ruh u la ïoh ban thep ar kol.
Ha kawei pat ka liang, u Fivestar Shylla, u ba la tyngshaiñ bha ha ki jingïalehkai naduh ba sdang ka lympung u la pynkut ïa ka lynti ïaid tad haduh ka final da kaba kynjoh 17 kol, ha kaba u la ïoh ban pynkhihjar biang mynta ka sngi hynrei sniew bok kane kam shym la lah ïarap pyllait ïa ka kynhun na ka namrem.
Ka Big Futsal Fest ka la ïaid shakhmat kumba la kular da ka jingdon ki jinglehkmen bad ki jingïalehkai paralok fbad palat spah ngut ki briew kiba la wan sakhi ïa kane ka lympung ryngkat ka jingsngewhun.
La sdang ïa ka sngi da ki jingïalehkai women’s Futsal hapdeng ki nongtrei ka Rani Motors bad ki khynnah pule ka MIMHANS. Ka jingïalehkai ka la pynlong ïa ka jinglehkmen ban ïaid shakhmat tad haduh ka jingïakhun kaba khatduh ha kaba baroh ar tylli ki kynhun ki la pyni ba ïa ka Futsal lah ban ïalehkai bha da ki kynthei jong ka jylla ruh kumjuh.
La khylliap ïa kane ka lympung da ka jingsam ïa ki khusnam ha kaba u Fivestar Shylla u la khur ïa ka Golden Boot, u Sheen Sohktung u la khur ïa ka Golden Ball kum u rangïalehkai ba kynsai tam, bad u Kitbok Nongrum jong ka MIMHANS u la khur ïa ka Golden Glove kum u rangapkol ba kynsai.
U rangïalehkai lympung I-League bad kynhun India barim, u Aiborlang Khongjee u la aiti ïa ka khusnam sha ka lahduh jong kane ka lympung futsal Inter Office ba nyngkong ha Shillong, ka AG Meghalaya FT.
Ka Big Futsal Fest ka dei ka jingïatreilang jong ka sorkar bad ki kompeni riew shimet ban kyntiew ïa ka Futsal ha Shillong da kaba thaw bad wanrah ïa ka tamasa jong ka jingïalehkai, ka jingïakhun paralok, baroh katba ka dang kyntiew ïa ka jingdonkam jong ka sports na ka bynta ka koit ka khiah bad ka bha ka miat.
La pynlong ïa kane ka lympung da ka Big FM ryngkat ka jingkyrshan na ka tnad Sports ka Sorkar jylla, lem bad ka Maruti Suzuki Arena, Royal Enfield, Indian Bank, T7 News bad ka Directorate of Information & Public Relations.
