Mawkyrwat, Kyllalyngkot 20: Ka Khasi Student Union jong ka Mawkyrwat Circle ka la ïoh ban pynhap pyrsa noh ïa ka lympung ïalehkai kynjatbol ba la tip kum ka 3rd Maitshaphrang Under – 16 Football Leagues 2025-2026 ha kaba u bah Renikton Lyngdoh Tongkhar uba dei u MLA ka Mawkyrwat Constituency u la long kum u kongsan ha ryngkat u bah H.S. Diengdoh kum u symbud kongsan.
Ha kane ka lympung ïalehkai, ïa ka nam lahduh la rah da ka Advance Centre Mawkyrwat Football Team kaba la jop pyrshah ïa ka Ong-la-hoi Football Club.
Ka jingthmu jong kane ka lympung ïalehkai kynjatbol ka long ban ai mynsiem na ka bynta ki khynnah kiba hapoh ka 16 snem ban wan ïashimbynta bad ba kin lah ban pyni ïa ki sap jong ki khnang ba kan long ka jingmyntoi ïa ka lawei jong ki ha ki sngi ban wan ha kaba na ka liang ka KSU jong ka Mawkyrwat Circle ki la buh ruh ïa ka phang kaba long, “Yes Football, Say no to Drug”.
Kiwei de kiba la ïadonglang ki long ki nongïalam ba ha khmat jong ka KSU kata u bah Forwardman Nongrem kumu President ka KSU South West Khasi Hills District lem bad kiwei de ki ‘riew rangbah kiba la shah khot sngewbha.
