Jowai, Naiwieng 16: Ka kynhun ki thei ïalehkai phutbol jong ka 7-Wasa United kala kylla long ka lahduh kaba nyngkong eh haka lympung ïalehkai phutbol jong ki kynthei kaba la tip kum ka “1st Women League Football Tournament 2025”, kaba la pynïaid da ka West Jaiñtia District Sports Association, (WJDSA) Jowai ha madan Kiang Nangbah Stadium Dongmihsngi Jowai.
Kane ka nam lahduh jong ka 7 Wasa United la pynthikna hadien ka jingjop kaba 2-1 kol pyrshah ïa ka Carpe-Diem ha ka jingïalehkai kaba la long ha ka sngi Saitjaiñ, 15 tarik u Naiwieng, 2025. Ki ar tylli ki kol jong ka Amethis Darnei (59’) bad ka Nidaroiki Biam (60+3’) ha ka khyllipmat jong ki minit ba khaduh ka la pynskhem ïa ka 7 Wasa United ban khur ïa ka jingjop. Ka Deigracia Dan (49’) ka la thep ïa ka shi kol na ka bynta ka Carpe-Diem.
Hadien ka jingïakhun kaba khlem kol ha ka kylla step, ka Carpe-Diem ka la pynkhihjar nyngkong lyngba ka Deigracia Dan haka minit ba 49, hynrei tang hadien shiphew minit ka 7-Wasa United ka la pynïakhaid noh lyngba ka Amethis Darnei shuwa ba ka Nidaroiki Biam kan thep ïa ka namtam ha ki minit pynjlan shuwa ban kut ka kylla miet.
Ha kane ka sngi la sam ruh ïa ki khusnam shimet sha ki nongïalehkai ba kynsai tam, ha kaba ïa ka ‘Player of the Match’ la ïoh khur da ka Nidaroiki Biam (7-Wasa United), ka khusnam Top Scorer la khur da ka Daphimon Khyriem naka Ladthadlaboh, ka khusnam Best Goalkeeper ka la leit sha ka Nangpyniarbha Ryngkhlem (7-Wasa United), katba ïa ka nam Player Of The Tournament la ïoh khur da ka Baiarbha Nongrum naka Carpe-Diem.
Ïa ki khusnam sha ki nongjop la sam da u kongsan jong kane ka sngi u Bah S.K. Lato uba dei u Founder Member ka JDSA, ha ka jingdonlang ki nongkitkam ka WJDSA nalor kiwei de.
