Jowai, Naitung 27: Ka jingïalehkai phutbol 1st 7 A-Side Veteran Football Tournament bala pynlong da ka Sports & Youth Affairs Committee jong ka Chilliangraij Dorbar Shnong, Jowai kala poi sha kaba kut mynta ka sngi 25 tarik bad la wan ban pynhap pyrda da u Pastor M. Shylla kum u kongsan.
Hashwa ka jingïalehkai la don ka jingïalang bala pynïaid da u Cheini Niangti, Asst. Waheh Shnong Chilliangraij, na ka liang u Pastor M. Shylla haba ai jingkren ula ong ka kam ïalehkai phutbol mynta kala long ka lad kamai ïa ki khun samla, kumta u kyntu ba kin pyndonkam hok ïaka sap ba ki don khnang ban kin kiew shaphrang.
Haba phai sha ka jingïakhuh ka 12 Dolloi kala long ka kynhun ban ïoh rah syndon ïa ka nam lahduh da kaba pynliem da 3-1 kol ïa ka Mynthong Legend.
Ïa kitei ki lai kol na ka 12 Dolloi la ïoh ban thep da u Mayalang Lanong bad u Poibiang Pohshna, katba ïa ka shikol na ka Mynthong Legend la thep da u Me U Ru Suchen.
Ka kynhun ïalehkai jong ka 12 Dolloi kum ka lahduh kala ïoh khur ïa ka song pisa kaba 35 hajar tyngka ryngkat ka Trophy. Katba ka Mynthong Legend kum ka Runners-up kala ïoh ïa ka song pisa ba 20 hajar tyngka lem bad ka Trophy.
Na ka liang u kongsan jong kane ka sngi u Pastor M.Shylla kum ka dak ban ai jingkyrshan ïa ka Sports & Youth Affairs Committee Chilliangraij ula synñiang kumba 10,000/- hajat tyngka.
