Tang ha ki khyndiat sngi ba ladep, la ïohi, ba ki don ar tylli ki jingjia kiba saphriang ha ki social media bad ki lad pathai khubor bad kawei ka dei ïa ka jingshah kren jot ka samla na jylla ha ki khar ri thor ha Delhi bad nangta sa ka jingshah tied slipar uwei u nongñiah kali ha ki bynta jong ka nongbah Silchar ha Assam.
Kine ki jingjia, ki la jia haduh katne ïa ki briew jong ngi, ha kaba ïa ka samla na kane ka jylla kaba don ha Delhi, la sin la rngop, ba ka dei ka nong China, katba ïa u draibar trok, la tied syndon da ka slipar bad kane ka dei ka jingleh pohjait kaba la jubor haduh katta katta, ha kaba na ka jingïabakla, lada ka dei na kano kano ka daw, ym don ba lah ban shu leh pohjait haduh katne katne.
Ka ri Khasi, ka dei ka ri jong ki nongleit kai pyngngad bad ki wan na kylleng ka India, ba kynthup ruh ïa kito ki khar Assam ha Silchar, hynrei ngim ju kynmaw ba haba kine ki dkhar ki bakla lynti, ki leit poi sha ki shnong ki bym dei lane ba ki don ki jingïa lymbub kali, ban shim kabu haduh ban da tied syndon da ka slipar, namar ki jingbakla jong ki.
Hynrei kane ka jingjia, ka la long pynban, kum ka jingai jinghikai ïa ki hajar tylli ki kali jong ki khar Assam, kiba leit kai sha ki jaka pyngngad jong ka ri Khasi, ba kin shah tied slipar lem, lada ki kum leh bakla, ha ka jingshang pyrthei jong ki, kaba ki ïarung sha ki shnong ki thaw naduh kiba heh haduh kiba rit duh, naduh kiba jan eh, haduh kiba shajngai bah.
Kam dei tang kane ka jingjia, hynrei dang ha ki khyndiat taïew ba la dep, ki don ki rangbah Khasi, kiba shah shoh ha ki khar Assam hi, ha Cachar District. Nangta ki don shuh sa shibun kiwei ki jingjia ha Delhi lei lei, ha kaba la leh ñiew beiñ ïa ki kynthei Khasi ha katei ka nongbah, ha kaba la pyndonkam ruh, ha ki kam khaïi met.
Ki pulit ka jylla, ki dei ban shim jingtohkit mar mar halor ka jingshah kren jot ka samla Khasi ha Delhi bad kumjuh ka jingshah tied slipar jem daw jong u nongñiah trok, ha kaba ki dei ban leit kem ïa uto uba tied slipar, namar ba katei ka pyni, ba utei u briew, um shym la kheiñ shuh ïa u draibar Khasi kum u para briew.
Watla ha kiba bun ki jylla jong kane ka ri India ki la ai burom ai jingïaroh ïa ki paradoh parasnam Khasi halor ka jinglong jynsur mynsiem, ka jinglong lui lui bad shida mynsiem khamtam eh ïa ki briew kiba wan nabar jylla.
Hateng hateng la lap ruh ïa bun ngut ki briew kiba wan nabar ki shait bakla lynti bad poi kulmar sha ki shnong ki thaw kiba ym poi pyrkhat ban leit hynrei ha ka jingshah ïalam bakla ha ka Google Map online kiba bun ki bakla lynti bad shah ïalam bakla hynrei bunsien haba ki ïakynduh ïa ki Khasi ban kylli ïa ki lynti ïaid, watla kim nang ban jubab da ka ktien Hindi, hynrei ki pyrshang beit ban jubab da ka Hindi ban ïathuh nangno ka surok ne lynti ba kin leit phai.
Haoid ngim lah ruh ban len ba kin don beit ki ban shim kabu, khamtam eh ha kane ka por ba kynrei u drok, ba ki don ki runar kiba leh ïa ki kam thombor ne ban ktah kti ne ban thok ïa ki briew kiba nabar, hynrei kum kine pat ki shujia ryngkhat ne hateng hateng hynrei ym manla ka por ne ban thap bad tied da ka slipar ne ban shah kynjat bad ktah kti haba don ki jingbakla.
Shuh shuh lah ruh ban ai jingmut ïa ka imlang sahlang bad ka jaitbynriew hi baroh kawei ba kin hap long kiba peitngor bha ruh haba ki leit sha kino kino ki jaka khamtam eh haba ym ïasngewthuh bad ïapei haba ïakren ïa ka ktien ka thylleij jong kiwei pat ki jaitbynriew naba kane kan lah ban long ka jingma bad ka jingmynsaw lada khum bakla kren.
Ngi lap ruh ba jan baroh ki jaitbynriew ne ki nongshong shnong ka ri India kiba ha ki jylla bapher bapher kim ju pynhiar dor satia ïa la ka jong ka ktien kmie ne ka ktien shnong kumta haba ki ïakynduh ïa ki nongwei kim ju kren da ka phareng ne da ka ktien Hindi hynrei da ka ktien la jong, kum ka nuksa, ha jylla Assam ki kren beit tang da ka ktien Assamese, kumta ruh kiwei kiwei pat ki jylla bad tang kumba katto katne tylli ki jylla ki ban kren da ka Hindi shisha ne paka hynrei kiba bun hi ki kren da ka Hindi ïew (Bazar Hindi), kumta kum ki nongshong shnong ka jylla Meghalaya ne kiba na kine ki thaiñ shatei lammihngi kin hap long kiba husiar bad peitngor bha halor kane ka bynta.
