Lah palat 425 Sngi ka jingjah trei u Vice Chancellor, la shu bam tulop ei, bad ka jingbym shah weng kam satia

Ka jingjia, kaba sngew lyngngoh sat, ha kaba U Vice Chancellor jong ka North Eastern Hills University (NEHU) u pep trei la 425 sngi, hynrei um shah weng kam satia.
La ju ïohi, ba haba ki don ki chowkidar, ki peon, cleaner haba ki pep trei khlem jingbit, ka ju mih ka jingpynbna ha ki kotkhubor ban phah ba kin wan trei kyrkieh bad lada kim wan, kumta kin shah beh kam syndon; hynrei ha kaba ïadei bad utei u khlieh jong ka University, la ïohi, ba kaba kum katei ka jing pynbna ne ka jingmaham na ka NEHU lane na ka sorkar India, ba kam don satia, hynrei dei tang na ki nongtrei jong ka University, ki samla pule, ki nonghikai kiba ïai thad madan ïa utei u khlieh jong katei ka University, uba ïai bteng khlem pud ïa ka shuti kaba khlem shah ot tulop.
Haba U Conrad Sangma, um don ha ophis, la ïohi ba u heh jong u prah, ula khie bitar laiñ bad ula thad madan ha ki kotkhubor, hynrei haba utei u ram hah ka NEHU, ula shu bam suk tang ka tulop, da ki snem kynthih, hynrei ym don ba nud ban pyni bor pyrshah ïa u bad wat u MP, uba la jied da u paidbah, u shu long tang u nongai kyrwoh sha ka sorkar India, halor ka jinglong jingman jong ka NEHU, hynrei ban shim ïa ki rai kiba kham eh, uba pli u tyrsaiñ khlieh ïalade.
Kam dei tang kata, la ïohi, ba ka sorkar jylla, lada dei u Myntri Rangbah lane U Lat ka jylla, lane u Myntri ka Pule puthi, kim nud satia ban shim ïa ka rai kaba ïahap ïa ki kam shukor jong utei U Vice Chancellor bad ki rai kim iahap satia tang shi saphied ne shutak, na kaba la shim rai da ki dorbar shnong Mawlai bad ki nonghikai lem bad ki samla pule ka NEHU.
Ka seng NPP, ka dei kaba ïa donlang ha kajuh ka kynhun bad ka sorkar BJP ha Delhi, hynrei kaba lyngngoh, ka long ba kam sngewthuh ïa ka jingeh kaba ktah ïa katei ka University, na kiba kum kine ki jingleh jong U Vice Chancellor, hynrei la ïohi, kumba ki ïasylla lang bad ka sorkar India, ban pyndik bad pyndkoh ha ban da biang ïa ka kam ka beng jong katei ka University kaba la seng, naduh ka por jong ka jingioh jylla rilum.
Ngi don tang kawei ka University jong ka sorkar India, ha ka jylla Meghalaya baroh kawei, hynrei lada ka jingñiewkor jong ngi kam don, kumta katei kam thew ïa ka jinghiar jong ka NEHU, hynrei ka pyni, ba ïa ka jabieng jong u paidlang ka jylla, ka la tap da ka eit sniang suda lane ba ka jabieng kaba don hakhlieh ka la hiar pynban shaduh jingshong bad ba ngim sngewthuh shuh ban ñiewkor ban sei ïa ki stad ki jhad na katei ka University, hynrei ba kan sa poi ka por, ba tang ïa u nonghikai ha High School, hap wad da ki dkhar suda, namar ngim don ki samla kiba don ïa kitei ki kyrdan kiba heh.
Bad kaba isangsot ka long ruh ïa ki khynnah pule kane ka thaiñ shatei lammihngi kiba la shu kylla long langknia ei tang na ka daw ka jingleh jong utei u Vice Chancellor ka NEHU Shillong.
Katno ruh ka jingwan rah ïa ka jingdkoh ki jingtreikam jong kane ka skulbah mynta, la isangsot ban peit naba ka la shu pyntyllun ïa ki kam khlem kmie khlem kpa, namar u khlieh duh kane ka jaka pule u la shu jah beit na ka kamram la jong.
Shu donbok ba kane ka University NEHU ka don ha Meghalaya ban jin ba ka la don sha kiwei pat ki jylla ba kham lehsih, katta ka la kylla long ka jaka leit paiñkhana, ka jaka leit bar bad ka ktem ki kam sniew, namar lada u khlieh duh kane ka jaka pule um don ka suk bha ïa kiwei pat ki kam pyrshah imlang sahlang ba kin kharoi.
Ka jingpynslem jong ka sorkar Pdeng ban pynbeit ïa kane ka jingeh ka pyni ba kam don mon satia ban kyntiew ïa ki jylla kane ka thaiñ shatei lammihngi bad kyrpang ïa ka Jylla Meghalaya ba ieid jong ngi bad kaba i thamula shuh shuh ka long ba kane ka sorkar Nationalist Peoples Party kaba synshar ïa ka jylla ka la dei shisha kata ka sorkar puppet ne ka sorkar kaba hap ban shu kohnguh bad shu rah bowl beit sha Delhi.
Kane ka mat bad ka phang jong ka jingeh kaba mih hapoh ka Skulbah NEHU ka la donkam ïa ka jingpynbeit kaba kyrkieh bad kaba hap ban leh mardor naba kumba ka long mynta ka la ktah shibun ïa ki samla pule jong baroh kawei ka thaiñ shatei lammihngi bad khamtam ïa ka nam ka burom jong ka jylla Meghalaya baroh kawei.