Lah jan dep 100% ka jingsiang rong ïa ka surok Nongpoh-Umden, jurip biang u MLA bad ki ophisar

Nongpoh, K’Lyngkot 14: Ban pynthikna ba ki kam kin ïaid beit ïaid ryntih bad ban pyndep noh kloi ïa ka surok Nongpoh-Umden-Sonapur haka por kaba biang, ka ba dei ruh ka surok ba ki paidbah kila ap khmih lynti la slem ban pyndep noh, u MLA ka Nongpoh u Bah Mayral Born Syiem lem bad ki ophisar kila leit ban jurip biang sa shisien ïa utei ka surok naduh Nongpoh ter ter shaduh Umden.
Shuwa ban pynlong ka jingjurip la sdang shuwa da ka jingïalang ha iing dorbar ka shnong Iewmawlong lem bad ki nongïalam shnong ka Iewmawlong bad Mawdiangum haka jingdonlang ki heh pulit ka Ri-Bhoi ha kaba ha kane ka sngi la ioh ruh ban ïakren kumno ban pynbeit bad pynkylluid ïa u surok haki bynta ba don ka iew kaba dei ruh ka khyrdop ban rung sha ka surok Umden, bad hadien katei ka jingïalang naka liang u MLA lem bad ki ophisar ka tnad PWD kila leit pat ban jurip ïa katei ka surok shaduh ki bynta ka thaiñ Umden.
Haba kren sha ki lad pathai khubor hadien ka jingjurip naka liang u MLA ka Nongpoh u Bah Mayral Born Syiem u la ong ba kane ka jingjurip ka long ban pynthikna ba katei ka surok un dep kloi noh haka por kaba biang bad khamtam ban pynitynnad haki bynta jong ka Iewmawlong kaba dei ruh ka jingsdang bad ka khyrdop jong katei ka surok bad la kyrpad ruh ïaki nongshong dukan ba kim dei ban tur shakhmat khnang ba ka surok kan long uba khylluid.
U MLA u la ïathuh ruh ba naka liang ki nongïalam shnong ka Iewmawlong bad Mawdiangum kila pynthikna ruh ban pynioh ïaki jaka shong dukan ba kyrpang naka bynta ki briew kiba ju shong dukan harud ka surok ha Iewmawlong khnang ba kan pynitynnad bad pynlong ruh ïa u surok ban kylluid ka leit ka wan.
Ha kaba ïadei bad ka jingshna bad siangrong ïa ka surok naduh Nongpoh Umden Sonapur naka liang u MLA u la pynpaw ka jingsngewhun bad baroh ki kam kila dep 100% bad kaba sah ka long satang ban siang ïaka syrtap kaba ar jong ka rong naka bynta ban pynjlih bad pynbha shuh shuh ïa ka surok bad ïa kane ka kam ruh la sdang mynta bad kan shim por sa kumba 2 taiew eiei ban pyndep.
Shuh shuh naka liang u MLA u la ïathuh ruh ba ha kine ki bnai ban wan kin sa don bun tylli ki jingïaseng kiba heh ki ban sa long sha ka thaiñ Umden bad kum u nongmih khmat u la pynthikna ban pyndep pura ïa ka surok shuwa kitei ki jingïaseng khnang ba kan pynsuk ïaki paidbah nongleit nongwan.