Lah duh ka St Peter’s RCLP ïa ka lympung L.P School Sports Meet ha Nongstoiñ

Nongstoiñ, Ïaiong 11: Ka St Peter’s RCLP School ka la rah ïa ka nam lahduh ha ka lympung kaba 10 jong ka Nongstoiñ Town Inter School Sports Meet 2025, kaba la poi sha kaba kut jong ka hynne ka sngi ha madan NDSA Nongpyndeng.
Ka nam lahduh sha ka St Peter’s, ka dei hadien ba ka la ïoh bun tam ki takma ksiar bad kane ka la pynlong ïa ka ban khur ïa ka nam kum ka lahduh ha kane ka lympung ba mynta. Kiwei pat ki khusnam lahduh jong kane ka lympung ki long ka nam lahduh sha ka Anderson School kaba la khur ïa ka jingjop ha ka Mass Drill bad Best March Pass sha ka Laitkseh Govt. L.P School.
Shuh shuh ki khusnam ba kyrpang ki kynthup ruh ïa ka Best Athlete na ka bynta ka Sub Junior Boys sha u Evomi Diengdoh jong ka Mawkhlam Nongpyndeng, Sub Junior Girls sha ka Kimberly Rose Lyngdoh jong ka Anderson School. Katba ïa ka nam Best Athlete na ka bynta ki Junior Boys la ïoh da u Malcolm Pariong na ka Assembly of God School bad Junior Girls pat la ïoh da ka Insaïaibet Thabah jong ka Bethel Presbyterian School.
Ha ka jingïalang ba lyngkot shwa ban sam ïa ki khusnam sha ki nongjop, u kongsan Bah B.Lyngkhoi Chief Engineer, CEA Ministry of Power & Officio Additional Secretary to the Government of India u la shim ruh ïa ka kamram ban sam ïa ki khusnam sha ki nongjop bapher bapher.
Haba kren ha ka jingïalang na ka liang u kongsan u ba long ruh u rangbah nongshong shnong na Nongstoiñ, u la ong ba kum kane ka kabu, wat ha ka por jinglong khynnah jong u ym shym la lah ban phohsniew, namar ki jingeh bad jingduk. Hynrei, u la ong ba kane ka dei ka kabu ba ki heprit kin ïohlad ban sei ki sap ki phong, lyngba ka jingdon ki riew pyrkhat kiba ïohi kumno ban saiñdur ïa ki khynnah naduh ba ki dang rit.
U la ai mynsiem ruh da kaba ong ba kim dei ban sngew rit lane ym lah kot kyrdan bad kiwei, hynrei ki dei ban don ka mynsiem kaba skhem kaba khlaiñ bad ka mon kaba jwat ban ïakhun bad jop ïa ki jingeh. U Blei u don ryngkat bad pynkhlaiñ ha ka jingïadei ban ïa beh bad wad ïa ki mawlynnai ka jingim lyngba ki lynnong kot man ka sngi bad ha kam kilan met ruh.
U la ong ruh ba ha kiwei ki ri kiba la shai, wat ki khynnah kiba dang rit lane dang lai snem ruh la wad ïa ka sap kaba ki don, hynrei ngi hangne ngi hap ban wad shwa ïa ki jingpule bad ngi buh ïa kine ki sap ki phong ïalehkai shadien. Hynrei ai ba kito kiba don ïa ka jabieng ban pule pyndep ïa kata ka thong wat pynlehnohei.
Na ka bynta kito kiba don shisha ka sap kyrpang ha ki kam ïalehkai, dei ban khring ïa ki sha kane ka shlem saiñ dur ban sara ïa ki naduh dang rit, khnang ba kin long ki nongïalehkai kiba paw nam kumba long kiwei pat katkum kane ka juk. Ïa kane donkam ruh pat de ïa ka jingïohi jngai na ka liang ki kmie ki kpa khamtam, ba ki dei ban peit ïa ki khun katkum ka sap ba ki don da kaba buh ruh ka thong na ka bynta ki khun ha kano kano ka sap ba ki don.
Khatduh eh u la kyntu sha baroh ki heprit ba ki dei ban ïaid ha ka lynti kaba dei ban pynleit jingmut ha ki lynnong kot, kohnguh ïa ki kmie ki kpa, ki nonghikai skul bad ban kiar na ki jingsniew baroh kiba la nang jyllei ha kine ki sngi, khamtam u drok u jingdih ba sniew ba la jyllei palat mynta ki por haman ki jaka. Hadien ka jingïalang na ka liang u kongsan u la pynhiar ruh ïa ka lama jong ka synjuk bad pynbna ruh ba la pynkut ïa kane ka lympung ba mynta u snem.
Ha kane ka sngi la donlang ban sakhi ruh da u Dr Juristman Ïawphniaw MDC ka Nongstoiñ kum u Symbud kongsan, ha ryngkat ka jingdonlang kiwei de ki riew pawkhmat, ki kynthup ïa ki nongkitkam barim ka Synjuk, ki Pastor, ki Headmaster, Headmistress, ki nonghikai skul bad kiwei kiwei de.
Shuh shuh, la pynkup burom kyrpang ruh ïa u Babu K.K Lynser President ka Synjuk ba mynta u ba la shongthait noh na ka kam, hadien ki bun bun phew snem ba u la shakri ban pynlong ïa kane ka lympung ïalehkai sports ki khynnah skul L.P ha sor Nongstoiñ.