Lah donkam ban ban pynkylla kyrteng noh ïa ka Meghalaya sha ka Khasi-Jaiñtia-Garo Land, ong ka AYF

Shillong, Ïaïong 05: Ka seng All A’Chik Youth Federation (AYF) ka la buh ka jingkyrpad ïa u Myntri Rangbah ka jylla u Conrad K. Sangma ba la donkam ban ai kyrteng noh da kaba thymmai ïa ka Meghalaya sha ka “Khasi-Jaiñtia-Garo Land” kaba hab ruh hapoh ka Article 3(e) jong ka riti synshar jong ka ri India.
Ha kaba ïadei bad kane na ka liang ka seng ka la pynpaw ba ka kyrteng jong ka jylla ba la ai ‘Meghalaya’ kaba mut ka jaka sah ne shong jong ki lyoh ne “Abode of the Clouds” ha ka jingmut jong ka Sanskrit, kam shym la mih pli ïa ka nongrim jong ki riewlum, kiba dei ki Khasi, Garo, bad Jaiñtia.
Kane ka jingdawa katkum katei ka seng, ka la pynpaw ba ka ïeng na ka jinglong kyrpang jong ka khana pateng jong ka jylla kaba la ïoh ïa la ka jong ka jylla ha ka 21 tarik u Kyllalyngkot, 1972, kaba mih ruh na ki jingsngewkhia halor ka polisi ban pyndonkam ïa ka ktien Assamese naba kane ka long ka jingma ïa ka jinglong kyrpang jong ki riewlum kiba ïapher pat na kiwei ki jaitbynriew jong ka ri India.
Kumta halor kane na ka liang ka seng ka ai ki jingmut kaba lah ban shim da kawei pat ha ka ban ai kyrteng noh da kawei ïa ka jylla na ka kyrteng Meghalaya kum da ka “Tribal Land” lane ka “Tribal State,” da kaba kyrpad ïa u Myntri Rangbah u Conrad Sangma ban wanrah ïa kane ka mat ïatainia ne motion hapoh ka Ïing Dorbar Thaw aiñ ka ban sa long jong ka jylla.