Lah dep siew ïa ka Post Matric Scholarship sha ki 16,964 ngut ki samla pule sa 59,791 ngut ki bym pat ïoh

Shillong, Risaw 22 : Ka Directorate of Higer & Technical Education jongka jylla ka pyntip ba ka la dep siew ïa ka Post Matrict Scholarship na ka bynta u snem 2023-2024 sha ki 16,964 ngut ki samla pule hadien ba ka tnad Ministry of Tribal Affairs jongka sorkar pdeng ka la pyllait ïa ka pisa haduh 38,08,91,952 klur bad ka sorkar jylla ka la pyllait 4,23,21,328 kaba dei ka jingpyllait pisa kaba nyngkong bad kiba ym pat ïoh ïa ka scholarship ki don sa 59,791 ngut ki samla pule. ïa kine ki bym pat ïoh la pyntip ba ka sorkar jylla ka dang leit bud dien bad ka tnad Ministry of Tribal Affairs khnang ba kan pyllait noh ïa ka jingpyllait pisa kaba ar ba ka tnad Directorate of Higher and Technical Education kan ïoh ban siew lut noh sha baroh ki samla pule ki bym pat ïoh ïa ka scholarship.
Ka tnad pule jongka sorkar jylla ka kular skhem ba baroh ki samla pule kin ïoh beit ïa ka scholarship jongki haka por kaba biang tang shu pyllait biang ka tnad Ministry of Tribal Affairs ia ka pisa kaba sah. Lada ki samla pule ki don kano kano ka jingartatien ne jingbym shai ki lah ban phah da ka jingthoh sha ka Directorate of Higher and Technical Education lyngba ka email dydhtetechnical2@gmail.com.