Lah beit ban rep bad riang ha ki jaka ba la dep tih dewiong: Phrangki Pale

Khliehriat, Nohprah 16 : Ka Thwai Syiem Society kaba na Sutnga, ha ryngkat ka jingïatreilang bad ka Dorbar Shnong Narwan ka la mih shakhmat ha ka sien kaba nyngkong ban pynpaw pyrthei ïa ka jingdon ki jaka jngohkai pyrthei kiba itynnad kiba don ha ka thaiñ.
Kadei ha ka 14 tarik mynta u bnai ha ka jingïalang ba la pynlong ha Madan Mookhlot katei ka Society ka la sdang ban pynpaw pyrthei ïa ka kshiad Blo kaba don ha kawei ka jaka ba khappud bad ka shnong Narwan bad shnong Sutnga.
U Project Engineer State Sport Council jong ka jylla Meghalaya, u bah Phrangki Pale u la wan long kum u kongsan ha katei ka sngi ba pynpaw paidbah ïa ka kshaid Blo kaba don ruh hajan eh bad ka kper soh kaba paw nam bha jong u bah Self Daniel Lyngdoh bad ruh ban poi sha kane ka kshaid hap ban iaid lyngba ruh na ka kper soh kaba ju tip ruh kum ka Khasi Mandarin Farm jong u bah S.D.Lyngdoh, u bah Pale u la leit ruh ban jurip kyrpang ïa katei ka kper soh kaba la paw bha ym tang hapoh ka jylla hynrei wat shabar ka jylla ruh.
Haba kren kum u kongsan, u bah Phrangki Pale, u la ai khublei ïa ka Thwai Syiem Society kaba la mih shakhmat bad sdang ïa kane ka kam ban kyntiew ïa ka kam jngohkai pytrhei da kaba ki la sdang shwa ban pynpaw pyrthei ïa kane ka kshaid kaba itynnad, kaba ki khot ka kshaid Blo lane ka Blo Waterfall bad u la ong “ Nga sngew sarong ban iohi ba ki don kum kine ki jaka kiba itynnad ha kane ka thain bad nga khmihlynti ba ka Thwai Syiem Society kan nang ïai bteng ban ïaid shuh shuh sha khmat ban kyntiew ïa ka thaiñ ha ka kam jngohkai pyrthei ka ban long ruh kawei na ki lad kamai jong ki paidbah jong ka thaiñ ”
Haba kren pat shaphang ka kper rep soh bad ka rep dohkha jong u bah Self Daniel Lyngdoh, u bah Phrangki Pale, u la ai ka jingiaroh namar ka jinglah ban pynwandur itynnad ïa ka kper rep soh kaba heh bha bad ki jaka rep dohkha jong u tei u rangbah uba na ka shnong Sutnga, kaba ka jingheh ka jaka rep ka don haduh 125 Akar, u la bynrap ruh da kaba ong ba watla kane ka jaka ne ka thaiñ ka la dei ka jaka ba ju tih dewïong bha mynshwa,kaba la dei ruh ka jaka shrah bym don shuh ki dieng ki siej hynrei sngewtynnad pat ban iohi ba mynta ka la kup da ki rong jyrngam, ka jaka ka la dap da ki dieng soh, ki dieng khlaw bad ki pung rep dohkha, u la bynrap bad ong ba “Kane ka pyni shynna ba lah beit ban rep bad riang ha ki jaka ba la dep tih dewïong ”
U la ong ruh ba “Kane ka kper soh kan dei ruh kawei na ki jaka kaba itynnad ka ban khring ïa ki nongjngohkai pyrthei, namar kumba bun ki briew ki la leit ban peitkai bad jngoh ïa kawei ka kper soh grape kaba don ha Nasik bad ki da sah miet ruh, kumta nga khmihlynti ba kane ka kper soh jong u ma Self Daniel Lyngdoh kan dei kawei ka ban khring ïa ki briew bad ruh namar ba kane ka kper soh ka don ruh hajan bha bad kane ka kshaid Blo kaba jngai tang kumba san minit na kane ka kper soh bad kaba ki briew ki hap ruh ban iaid lynti lyngba na kane ka kper soh ban poi sha kane ka kshaid Blo bad hangne ki nong jngohkai pyrthei ki lah ruh ban pynlut por baroh shi sngi bad ka mariang ba itynnad”
U la ong ruh ba u bah Self Daniel Lyngdoh u dei u nonglam lynti bad uba la long ruh ka nuksa ïa kiwei khamtam ïa kito ki bym don kam don jam ba kin sdang da ka kam la jong da kaba rep soh bad da ka rep ka riang.
Kumjuh ruh u Deputy Secretary jong ka Jaiñtia Hills Autonomous District Council, u bah Boimi Mulieh, u la ong ba u khlem poi pyrkhat satia ba kine ki jaka kin long kumne kiba dap da ki soh ba bun jait khamtam u soh ñiamtra, ki dieng ki siej “Lada don tang lai saw ngut ki briew kiba napoh ka elaka Sutnga bad elaka Shapung kiba na Narwan ki ban mih shakhmat kum u bah Self Daniel Lyngdoh khmih lynti ba kine jaka kin khie im biang baroh bad kane ka jingdon ka kshaid Blo ruh nga khmihlynti ba kan khring ïa ki nongjngohkai pyrthei na kylleng bad wanrah jingmyntoi” ong u bah Boimi Mulieh.
U la ai khublei kitbok kitrwiang ruh ïa ka Thwai Syiem Society bad kan nang lah shuh shuh ban wanrah ïa ka bha ka miat ha kane ka thaiñ, u la bynrap shuh shuh ruh da kaba ïathuh shaphang ka jingdon ki krem kiba itynnad ha ka thaiñ Nongkhlieh kaba la khring ïa kiba bun ki riew ieid mariang bad kito kiba sngewtynnad ban rung krem.
U Secretary Shnong Narwan, u bah Leo Shadap u la ai ka jingkhublei ïa ka Thwai Syiem Society kaba la khot ban iatreilang ban kyntiew ïa kane ka jaka kaba don ha khappud jong ka shnong Sutnga bad ka shnong Narwan ban pynbha bad pynitynnad shuh shuh ïa kane ka jaka ba don ka kshaid Blo bad khmih lynti ruh bad da ka jingïatreilang hapdeng ka shong Sutnga bad Shnong Narwan yn lah ban pynbha shuh shuh ïa kane ka jaka.
U bah Leo Shadap, u la iathuh bad pynshai ba kane ka kshaid Blo ka ka don ruh ha ka wah Syrbang bad iathuh ruh ba la ai kyrteng ïa katei ka ksiad da ka kshiad Blo bad ïa ka thwei pat da ka Thwai Blo dei namar ba mynshwa eh, la don uwei u briew uba na ka shnong Narwan, uba kyrteng u Blo Langstang uba dei u nongsharai masi bad u ju sngewtynnad bha ban sum ban sait ha katei ka thwei bad ha kawei ka sngi u la kum ur bad hap ha katei ka thwei hynrei u la lait im khlem jia kaei kaei kaba sngewsih bad kumta la khot noh ïa katei ka thwei da ka Thwai Blo bad ka kshaid pat da ka kshiad Blo.
Utei u Secretary jong ka shnong Narwan u la iathuh shuh shuh da kaba ong ba “Ngim ju poi pyrkhat ba kine ki jaka kin long kiba itynnad, dei naduh ka ka por ba long khangdam na ka daw ka jingpang covid-19, ngi ioh ha ki social media ba post ki briew ïa ki dur jong ka kshaid, ka thwei bad ki jaka sawdong ba don hangne kumta ngi kynmaw bynriew bad ngi sdang phai khmat bad ngi la leit ban peit bad lap ba kane ka jaka, kane ka thwei bad kane ka kshaid ka long kaba itynnad shisha bad kane ka jaka ka jngai tang 2.5 kilomitar na ka surok shnong Narwan.
U bah Self Daniel Lyngdoh ruh u la iathuh ïa kajuh hi bad ong ba “Ngi hi ngim ju kynmaw eiei ïa kine ki jaka bad dei ha ka por ba jia kato ka khangdam ba ki briew kim don jaka ban leit bad ki la ïa poi ïaid kai sha kane ka thaiñ bad wan bad poi ruh sha kane ka thwei bad ka jaka ba don ka kshaid kaba don ha khappud jong ka shnong Narwan bad shnong Sutnga, ka dei shisha ka jaka kaba itynnad, ki don ruh ki dieng kiba itynnad kiba ker ïa kane ka wah, ïa ka thwei, ka kshaid” u la ong ruh ba da ka jingïatreilang ngin lah ban kyntiew ïa kane ka jaka kum ka jaka jngohkai pyrthei.
Uba pyniaid ia ka jingialang, u bah Minday Nongtdu u la ong ba ka jingai mynsiem bad jingpynshlur jong ki shnong ki thaw kiba don marjan ka pynlong ruh ïa ki kum ki nongïalam bad ki dkhot jong ka Thwai Syiem Society ban mih shakhmat bad sdang ban pynpaw pyrthei nyngkong eh ïa kane ka jaka ba don kane ka kshaid Blo bad khmihlynti ba kane ka kam ban kyntiew ïa ka thaiñ kan ïaid shakhmat bad u la ong ruh ba kum ka jingpynshai bad jingpyntip paidbah ba na ka liang Sutnga bad naduh ka shnong Moopala haduh kane ka jaka ba don kane ka kshaid Blo ka jngai tang kumba 2 kilo mitar.
Hadien ka jingialang, u kongsan, ki dkhot jong ka Thwai Syiem Society, ki riew rangbah ka thaiñ, lem bad ki khynnah ki la leit ban jurip ïa ka Thwei Blo bad ïa ka kshaid Blo, la pynbyrngia shuh shuh ruh ïa ka prokram da ki jingshad na ki hep rit kiba na ka shnong Sutnga.