Shillong, Nailur 2 : Ki nongïalam bad ki dkhot bym hun shuh ïa ka rukom treikam jongu President ba mynta u bah Ernest Mawrie ki lah ban ujor bad dawa weng noh ïa u kum u President ka BJP ha kane ka jylla ha ka jingwan jngoh ba arsngi jongu National General Secretary ka party u B.L Santosh.Une un wan poi ha kane ka nongbah ha ka Sngi Saitjaiñ.
Ka tyllong khubor napoh ka party hi ka ïathuh ba kawei na ki mat ba kine ki nongïalam bad ki dkhot ki bym hun shuh ïa ka rukom treikam u bah Mawrie ka long ban dawa weng ïa u na ka shuki President bad ïa kane kin leh ha ka jingïalang ka ban long lashai hi ka sngi.
La ïathuh ba kiba bun ki dkhot jongka BJP ne kita ki Karyakartas ki la kynnoh ba u bah Mawrie u pynïaid marwei palat ïa ki kam ne u long kum u dictator. La ai nuksa ha ka jingwan pynïasoh jong ki nong Mawsynra sha ka Party u bah Mawrie ha ka jaka ba un ïadon lang hynrei u kynnoh pynban da kumne kumtai ïa ki nongïalam ka BJP kiba la pdiang sngewbha ïa kitei ki nong Mawsynram da kaba kren lyngba ka phone ba ym dei ban shah rung ïa ki hapoh ophis ka party.
Lah ban pynkynmaw ba palat 200 ngut ki nong Mawsynram ki la wan ban pynïasoh sha ka BJP bad la pdiang sngewbha ïa ki da u National Executive Member u bah A.L Hek.
U bah Hek ula pynïaid ïa kane ka kam daka jingbthah jong ki nongïalam na Delhi bad halor kane ka jingleh meng jong u bah Mawrie la dep ujor ruh sha ki bor ba halor ka BJP sha Delhi.
Dang ha kine ki khyndiat por u National Vice President ka BJP uba dei peit ïa ka Meghalaya u Dr Chuba Ao u la kynnoh ïa u bah Mawrie ba u dei u mawjynthut ïa ka party ha Meghalaya da kaba kynnoh ba u dei ruh u agent ka NPP.
La kynnoh ruh ba u bah Mawrie u pyrshang ban pyntlot ïa ka BJP da kaba u jied da ki kyrtong bym paw ha kane ka election 2023 ban wan. Kumta halor kine kiei kiei baroh u bah Mawrie u lah ban shah weng bad ha ka jaka jongu ki nongïalam na Delhi ki lah ban thung da kiwei pat ki nongïalam. Ki nongïalam kiba paw ba lah ban shimti ïaka shuki ki long kum u bah A.L Hek, bah David Kharsati, bad sa lai ngut kiwei kiba ka tyllong khubor kam pat kwah ban pynpaw.
