Shillong, Jymmang 20 : U National President ka NPP uba dei ruh u Myntri Rangbah ka jylla u Conrad K Sangma u la ïathuh ba ka NPP ka dang pynkhreh ban ai dieng sympat ne shabuk ïa uwei ne arngut ki MLA ka party kiba sdang ban tam laiñ da kaba ïakren bad ïa sylla bad kiwei ki party.
U la ïathuh “ Na ka liang ka party ka la pynkhreh ban ai jingpynsaja ïa ki kat kum ki kyndon jongka party. Hooid kiwei kiwei pat ki ïalong kawei lait noh tang uwei ne arngut hi kiba ngi la ïoh jingtip ba ki sdang ban ïa sylla bad kiwei ki party”.
“ Kumba ka long mynta ka party ka dang pynkhreh ban ai jingsneng ïa uwei na ki MLA bad lehse na kata ka daw u pyrshang ban ïakren bad kiwei ki nongïalam jong kiwei pat ki party” ong u Conrad.
U MLA jongka Nongstoin u bah Macmillan Byrsat u long u khlieh jongka Disciplinary Committee.
Dang ha kine ki khyndiat sngi u Dr Mukul Sangma Nongïalam ka Liang Pyrshah u la ong ba kin sa don ki MLA ka NPP ki ban sa mih na ka party shwa ka election MLA 2023.
Lada ki dang don kiwei kiba khreh mih ïa kata ym tip shatia. “ Ngam tip shaphang kita kiwei sngewbha kylli na u Dr Mukul Sangma. Namar ngam don kyntien ban batai dei ka jingïathuh bad pynbna jongu bad dei ma u ban don ka jubab kaba biang” ong u Conrad.
U la ïathuh ba ka Election Committee jongka NPP kan long ka committee ka ban peit bad bishar na ka bynta ban ai tiket ïa ki ban ïakhun na ka party. “ Kane kam dei ka kam jong ngi shimet wat la nga dei u president ruh namar hap ban bud kat kum ki kyndon treikam jongka party” ong biang u National President.
Haba la kylli hato ka kurim jongu ka Mehtab Chandee kan ïakhun ïa ka election ha u 2023, u Myntri Rangbah u la ong “ ïa kane te phi hap ban kylli na ka namar ngam pat tip ei ei shaphang kata, Ngam don ei ei ban ong ne kynthoh namar ka dei ma ka ka ban shim rai bad ban pan tiket na ka party. Lada ka pan tiket te ngan sa tip bad ngin sa shim ïa ka rai keiñ” rymmuiñ artad u Myntri Rangbah.
