Shillong, Nailar 6 : Kat kum ka tyllong khubor ba la ïoh la ïathuh ba hadien ka jingwan pynïasoh jong u bah Ronnie V Lyngdoh MLA ka Mylliem Constituency sha ka NPP ka la don ka jingïakren ba ka NPP kan phah noh ïa u bah Hamletson Dohling MLA ba rim ka Mylliem kum u MP sha Rajya Sabha namar ka samoi jong une u MP ba mynta u Dr Wanweiroy Kharlukhi kan kut noh ha ka 19 tarik Jylliew 2026.
La ïoh jingtip ba kane ka long ka jingïapynbeit shwa ban pdiang ïa u bah Ronnie sha ka party NPP namar ym lah ban len u bah Hamletson Dohling ruh u dei uwei na ki nongïalam ba trei bha na ka bynta ka party. Ym tang ba u trei na ka bynta ka party hynrei u trei shitom ruh ban wanrah bun ki skhim pynroi pynpar sha ka Mylliem Constituency wat lada um shym la long MLA ruh. Hynrei namar ba ka NPP ka ïalam ïa ka sorkar kumta u ïoh lad ban wanrah bun ki skhim pynroi pynpar shapoh ka Mylliem Constituency.
Kane ka jingthmu lehse ban phah ïa u bah Hamlet sha Rajya Sabha ka long ruh halor ka nongrim ban kham pynsuk ïa ka NPP ban ai tiket ha u 2028 namar lada don baroh arngut ki kyrtong kan buh ïa ka party ha ka jingeh ïano ban ai tiket. U bah Hamlet u dei uba la rim ka jinglong dkhot ha ka NPP bad u bah Ronnie u dei uba dang thymmai hynrei u dei pat u MLA ba mynta. Kumta da kane ka jingrai ban phah beit sha Delhi khlem pep kan pynsuk ïa ki nongïalam jongka party ban pyrkhat wat ïa ka tiket ha ka election MLA 2028 ruh.
Ka samoi jongka ïing Dorbar Thawaiñ Rajya Sabha ka long hynriew snem. U Dr Wanweiroy Kharlukhi u la shah jied kum u MP kane ka \ïing dorbar naduh ka 19 tarik Jylliew 2020 bad un kut noh ha ka 19 tarik 2026. La ïoh jingtip ruh ba na ka liang u Dr Wanweiroy Kharlukhi un ym treh shuh ban dang ïakhun biang ïa kane ka election.
