Lah ban mih ar kynhun ki Sing lada kam don ka jinghun ïa u kyrtong

Nongstoiñ, Naitung, 7: Ka seng Hill State People Democratic Party Nong-stoiñ Pyllun, ka la ïaid shait shait ïa ka jingpynkhreh ban ïa mih madan ha ka elekshon ban sa wan jong u snem 2023 bad la ong ruh ba hapoh jong une u bnai Naitung, yn pynbna noh ïa ka kyrteng u kyrtong ka seng na Nongstoiñ.
La ong shuh shuh ba ki ba la shim ïa ka phom na ka seng ki don tang lai ngut kynthup ïa u bah Bobby Kharshandi, bah L.G Nongsiej bad u Babu Ning Marthong. Ka lyer elekshon na kane ka party ka ïathuh ba ha kane ka seng, lah kham slem hi ka la don ka jingsdang ïapher jingmut hapdeng jong ka kynhun u bah Kawang Dkhar bad u bah Donbok Thabah kiba dei ruh kum ki nongpynïaid ophis.
La ong ba ki nongpeit ophis ki kwah ïa u bah Kharshandi ba un mih madan, hynrei na ka liang u Ma Thing Lyngdoh uwei na ki radbah duh jong ka seng naduh ka por ïakhih Hilla State ryngkat u Maieit Hoping, um mon satia ïa u briew ba ki I mon kitei ki ar ngut bad la ong ruh ba lada kum bakla imat ka lah ban mih ar kynhun ki sing ha Nongstoiñ.
Haba ïadei bad katei ka phang na ka liang u Ma Thing Lyngdoh, u la shu ong, “Haba ka ïing ka long kaba heh bad haba don shibun ki khun, ka don beit ka jingïakynad kaba malu mala tangba ka dei tang ka kam ïing kam sem kaba dang lah ban pynwan dur”.