Shillong, Iaiong 3 : Ka Meghalaya ka lah ban mad ïa ka lyiur kaba shit na kaei kaba ju long bad kaba ïoh duna u slap, ong ka kaiphod ïathuh lypa ïa ka jinglong ka mariang ba la pynmih da ka Indian Meteorological Department (IMD).
Ka jingbatai lypa na ka bynta ka aiom shit jong u bnai Iaiong- Jylliew 2026 ka pyni ba ka jingshit kaba heh tam kan long na kaei kaba ju long sha kaba palat ïa kaba kaba ju long ha kiba bun ki bynta jong ka jylla, katba ka jingshit kaba rit eh ruh la khmih lynti ba kan dang long kaba palat na kaei kaba ju long baroh shikatta, kaba kdew sha ki sngi kiba kham shit bad kumjuh ruh ki miet.
Na ka bynta u bnai Iaiong, ka IMD ka pyni ïa ka jingshit kaba palat na kaei kaba ju long lada phai sha ka jingshit kaba hehtam ne ba duna tam ha kylleng ki jaka ka Meghalaya, kaba pyni ïa ka jingsdangkloi ban ïoh ïa ka aiom shit.
Hynrei, kum ka jingpyntngen ïa ki paidbah, ka IMD kala pynshai ba lah ban nym don satia ka heat wave ha Meghalaya ha baroh ki sngi jong u bnai Iaiong-Jylliew.
Ka kaiphod ka pynpaw ruh ïa ka jingsngewkhia halor ka jingktah ïa ka jingioh um ka thaiñ bad ka kam rep kam riang. La khmih lynti ba u slap un hap duna ïa kaba ju long ha kiba bun ki bynta jong ka thaiñ shatei lammihngi jong ka Ri India, kynthup ïa ka Meghalaya, kaba lah ban wanrah ïa ka jingma jong ka jingtyrkhong um hashuwa ki aiom slap.
