Lah ban ïarap ka sorkar ïa ka GHADC bad JHADC da kaba pyllait lypa ïa ka bhah khajna
Shillong, Nailar 1 : U Symbud Myntri Rangbah ka jylla uba dei peit ia ka tnad District Council Affairs (DCA) u bah Prestone Tyngsong mynta ka Sngi Thohdieng u la ong ba ka sorkar ka lah ban ïarap ïa ki ar tylli ki District Council kata ka Garo Hills Autonomous District Council (GHADC) bad ka Jaintia Hills Autonomous District Council (JHADC) da kaba ai lypa ïa ka bhah khajna jongki khnang ba kin ïoh ban siew tulop ïa ki nongtrei jongki kiba ym shym la ïoh tulop la bun bun bnai.
“ Ki la don ki khep ba ngi la ju ïarap ïa ki da kaba pyllait lypa ïa ka bhah khajna jongki ADC. Ngi ju leh ïa kata bad ngin ïai leh ruh kumta bad mynta ruh ngin sa bishar biang namar ngi la ïohi ba baroh ar ki District Council ki la mad jingeh ha ka liang ka jingduna pisa tyngka” ong u bah Prestone.
U la ong ruh ba ki District Council ki dei ka tnad ba laitluid ne ki Autonomous Body kiba hap ban pynmih khajna hi da lade ban pynïaid ïa ki kam ki jam jongki.
Ki nongtrei ka GHADC kim pat ïoh tulop satia mynta la 42 bnai lynter kaba la wanrah ka jingeh kaba khraw ïa ki. “ Phi tip shai kdar ba baroh lai ki Council ki dei ban pynmih pisa hi da lade ba kin pynïaid ïa ki kam ki jam jongki. Nga tharai ki sngewthuh ba ka jingthung kam ruh ka dei ban don da u pud bad kan dei kaba la rai sani bha. Kumta na ka bynta kine ki lai tylli ki Council la ka dei ka KHADC, GHADC ne JHADC ki dei ban nang ban pynmih khajna da lade. Hynrei nga la ïohi na ka por sha ka por kane ka ïai jia beit ba ki nongtrei kin ïai duh tulop da ki bun bun bnai lait noh tang ka KHADC hynrei ha kiwei ka jia da ki snem lynter”.
“ Kumta na ka liang ka sorkar ka ju ïarap beit ïa ki lait nangta ym don ei ei ban ong lait noh tang ban ai jingmut ne aibuit ïa baroh lai ki District Council ba kin sngewthuh kumno ban pynduna ki jingpynlut namar lada kim leh kumta ym poi shano shano ruh. Namar lada ïoh lum khajna 100 tyngka bad pynlut pat 200 tyngka ïathuh ïa nga ïa kata pat ka 100 tyngka ba phi pynlut phin ïoh nangno?” kylli u bah Prestone.
“ Mynta ngi shaniah beit ha ka jingstad jong ki District Council namar ki donkam ban kunai bha ki jingpynlut ba kin lah ban pyndap pynbiang ïa ki jingdonkam jongki” ong biang u Symbud Myntri Rangbah.