New Delhi, Nailur 19: Ka Seng Congress ha ka sien kaba nyngkong eh ha ki 25 snem kan ïoh President da ki briew ki bym dei na ka longïing longsem jong ki Gandhi, namar ba arngut ki heh jong ka Seng, u Ashok Gehlot bad u Shashi Tharoor kin mih ban ïakhun ïa ka elekshon President jong ka Seng.
U Ashok Gehlot, udei u riewtymmen jong ka Congress bad mynta u bat kum u Myntri Rangbah jong ka Rajasthan. U Shashi Tharoor pat udei u Myntri barim jong ka sorkar pdeng bad u MP na Kerela.
U Gehlot udei uba don beit bad u nongkyrshan ba ha syndah eh jong ka longïing longsem ki Gandhi, katba u Tharoor udei uwei napdeng ki 23 ngut ba la ju tip kum kata ka G-23 ne ka Group of 23, ki nongïalam ka Congress kiba la dawa ban wanrah ka jingkylla ha ka jingtreikam jong ka Seng Congress.
Ka elekshon ban jied ïa u President ba thymmai jong ka Congress kan long ha ka 17 tarik u Risaw 2022. Ka Sonia Gandhi kala shimti kum ka President ba shipor ha u snem 2019, hadien ka jingiehnoh kam u Rahul Gandhi, namar ka jingshah rem kput ka Congress ha ka elekshon Lok Sabha ha utei ki snem.
U Tharoor, u la leit ïakynduh ïa ka Sonia Gandhi hadien ba ka la wanphai na ka jingshah sumar shabar ri bad u la ïoh ïa ka jingmynjur jong ka ban ïakhun ïa kane ka elekshon.
Kane ka jingmih ki kyrtong ban ïakhun, khamtam u Tharoor, ka long hadien ba u Rahul Gandhi, u la kyntait bad pyneh tdot ban shimti biang kum u President ka Congress, wat lada lai tylli na ki jylla ne ki Pradesh Congress Committee ki la kyntu ban shu thung ïa u Rahul kum u President jong ka Party.
Hynrei u Tharoor ha kine ki sngi baladep, u la ai da ka jingthoh sha ka All India Congress Committee (AICC) ha kaba u la dawa ba dei ban kham pynshai halor ka rukom jied ïa u President jong ka Party ne ban don ka rukom treikam kaba kham shai.
Nangta u la pynlong ruh ka jingïasoi paidbah da ki Samla ban dawa pynkylla bad pynbha ïa ka rukom treikam jong ka Seng Congress kaba la duh bun ki nongïalam ba radbah ha kine ki bnai baladep da ka jingmih nh kiba bun ki nongïalam kum u Kapil Sibal, u Jaiveer Shergill, u Sunil Jakhar, u Amarinder Singh, u RPN Singh, u Ashwani Kumar u Ghulam Nabi Azad bad u Hardik Patel.
