Lah ban ïakhun tang ka AITC bad NPP ha Nongstoiñ ?

Nongstoiñ, Jylliew 7: Ka Election ban jied ïa ki nongmihkhmat sha ka Ïingdorbar Thaw Aiñ ka jylla ka sah satang kumba khyndai bnai duna, ha kaba ki seng saiñ pyrthei ki la sdang ban ïa khih khohreh ban leit thung ïa ki tnad treikam ha ki shnong bad ki polling station bapher bapher ha la ki jong ki jong ki Constitunecy.
Haba phai ha ka Nongstoiñ Constituency na ka liang ki seng saiñ pyrthei kiba la don ïa ki kyrtong ki long ka Congress, ka NPP bad ka AITC. Ki kyrtong jong kitei ki lai tylli ki party ki la ïa durut hi khait ban leit tur haman la ki shnong ban thung ïa ki shnat treikam, na ka bynta ban pynkhlaiñ ïa ki party jong ki na ka bynta ban ïoh khring ïa ki paitbah nongthep vote ba kin jop ha ka election ban wan.
Haba phai sha kitei ki party, ka All India Trinamool Congress kaba dang shu rung tymmai hapoh ka jylla bad kiba bun ki riew paitbah bad wat ki riew rangbah ki ju kren beiñ, ba ka jingtreikam hapoh ka jylla ka dang lung palat Hynrei hapoh Nongstoiñ Constituency pat kumba ka long mynta, katei ka party kaba la ïalam da u bah Macmilan Kharbani kum u President bad u ban sa mih madan kum u kyrtong ha ka election 2023, ka la sdang ban suhthied bha bad ki paitbah ruh ki la sdang ban phai khmat lut sha katei ka party.
Ka jingsdang ban khie khlieh jong ka All India Trinamool Congress ha Nongstoiñ Constituency, ka dei namar ba u bah Macmilan kum u nongïalam u don ïa ka sap kaba kyrpang ban pynïadei bad ki paitbah, naduh ki ba duk ba suk, kiba don ba em, ki nongtrei sorkar bad u ba kloi ban ïarap ïa ki paitbah ha kano kano ka por ba ki donkam kyrkieh.
Nalor kata u dei ruh ba don ka jingkitkhlieh na ka bynta ka imlang sahlang, kumta ki paitbah ki ieit bha bad kumba ka long mynta ki dak ki shin, ki pyni ba ka jingtrei shitom ki nongkitkam jong ka Youth Wing bad Womens Wing, hapoh ka jingïalam jong u kum u president ka Constituency tang hapoh shi bnai, ka la lah ban leit thung kumba shiphew tylli ki Primary Unit ryngkat ki nongkitkam bad ki dkhot ha kylleng ka Constituency.
Ki shnat treikam kiba la dep thung bad pynskhem ïa ki nongkitkam bad ki dkhot hapoh shibnai ki long ka Nongkynjang, Domwahlang, Nongkhlaw, Marshan Namlang, Nongdiwah, Porsohat, Shohphria, Umlieh, Sylleiïawkheiñ bad Byrki Wahjynriew Primary Unit.
Kat kum ki tyllong khubor ba la ïoh lum na ki nongshong shnong kiba hap ha kitei ki primary unit kiba la leit thung da u President, la ong ba ki paitbah kiba wan ban pynïasoh sha party ki don palat shispah ngut ha man kawei pa kawei ka Primary Unit. La ong ruh ba kiba kham bun ki paitbah kiba wan pynïasoh ki dei na ka Indian National Congress bad ka NPP.
Nalor kata la ong ruh ba kin dang don shuh shuh ki paitbah ki ban wan pynïa soh biang sha ka party ha kitei ki primary unit ha ki sngi ban wan. Ka jingwan pynïasoh jong ki ka pyni shai ba imat ka jingïaleh ha ka election ha u 2023, kan long beit hapdeng u bah Macmilan Kharbani u kyrtong ka AITC bad u bah Macmilan Byrsat u kyrtong ka NPP u ba dei ruh u MLA ba mynta jong ka Nongstoiñ.