Nongstoiñ, Jylliew 16: Watla ka jinglong ka mariang bad ka jinghap slap ka kham kloi mynta u snem, hynrei ki jingthung jingtep pat kim da san bha bad haba nujor bad ki snem ba la leit ba ki nongrep biskot ki ju sdang ban kheit naduh ka taïew ba nyngkong jong u bnai Jylliew. Mynta u snem pat ki nongrep biskot ki dang sdang ban ïoh kheit dang ha kane ka taïew ba la dep.
Haduh kane ka lah sngi u blei kaba dei ka taïew ba lai jong u bnai Jylliew ka dor ïew ka dang neh sawphew tyngka shi kilo. Haba phai ha ki snem ba la dep ka ïew biskot ka dei ka ba thamula bha, namar ka dor kam ju neh slem don teng teng ba ha ka shitaïew ka dor ka kylla man la ka sngi.
Ki don ki por ba lada ka jingpynmih biskot jong ki nongrep ka bun ka dor ruh hiar kynsan lada duna ka jingpynmih pat ka dor ka lah ban neh saw haduh san sngi. Wat la katta ruh haduh bakut jong u bnai Jylliew ka dor ka mur lada ka hiar ruh kam da hiar bun, hynrei man la u snem tang shu mih u bnai Naitung ka jingpynmih biskot ka la bun bha ka dor ïew ruh ka la hiar mar shiteng ïa ka dor ba ki thied ha u bnai Jylliew.
Kaba kham jynjar palat ban pynïaid ïew ïa u biksot ka long mar shu jam ha u bnai Nailar, ki nongrep ki la shri ïam namar ka dor ka la hiar sha ka shiphew tyngka shi kilo bad haduh u bnai Nailur lei lei ka dor biskot ka ju hiar haduh ar tyngka shi kilo.
Ha une u snem pat ym pat lah ban tip namar ka jingpynmih biskot ka dang shu sdang, hynrei ym don jingartatien ei ei ba ha une u snem ka ïew biskot kan hiar ar shah ban ïa ki snem ba la dep.
