Lah ban don ka jingïadei ka kam khaiï beaiñ ïa u Dewïong bad ka kam khaiï drok, MP Tura

By Mawphor Editor On Apr 21, 2025

Shillong, Ïaïong 20: Ka lah ban don ka jingïadei na ka kam kit dewïong beaiñ, u shyiap bad u mawshun lyngba ka Meghalaya ha ryngkat ka kam khaiï drok.
Halor kane u MP ka Tura u Saleng A Sangma dangshen u la pynpaw ka jingsngewkhia ba ka jingkynnoh halor ka jingjur ka kam khaiï beaiñ na ki mar pohkhyndew ka lah ban ïaid lang ba ki kam khaiï beaiñ ïa u drok bad kiwei pat ki kam sha bar u pud u sam ka ri sha Bangladesh.
Une u MP nalor kiwei pat ki la pynpaw ba ki bor pynïaid ki leh matlah ïa ka kam khaiï beaiñ ïa u dewïong naba ki riew shimet kidei kiba donkti ha kane ka kam khaiï. Hynrei na ka liang ka sorkar ka kyntait.
“Kaei kaba nga tieng ka dei ka kam khaiï beaiñ hapdeng ka ri Bangladesh bad ka India. Ngim tip shisha kum kaei ka kam khaiï beaiñ kaba la jia,” pynpaw u Sangma.
U MP u la banjur ba ka jingpynleit jingmut kam dei ban kut tang ha ka kam khaiï beaiñ ïa u dewïong. “Ngi donkam ruh ban peit halor ki kam khaiï beaiñ ïa ki maw bad ka jingkit ïa kiwei pat ki tiar. Ka lah ban don bun ka kam khaiï kaba la jia ban ïa kaei kaba ngi tip. Kane ka donkam ban khmih bniah bha thik thik,” u la bynrap da kaba ong, “Balei kam don ka jingpeitngor kaba bniah halor kane?”
U Sangma shuh shuh u la pyntip ba u la pyrkhat ba shen un sa leit jurip shaduh ki kyndong kynshrot ki jaka ba ju jia bha kine ki kam khaiï beaiñ. U la ïathuh ba kan don ka joint meeting bad ki heh ka Customs, ka Border Security Force (BSF) bad ki heh ophisar na ki district ba ju jia kine ki kam ban lap ïa ki jinglong jingman bad ban wad ki lad ki lynti ban pynbeit.
Haba pynpaw ka jingsngewkhia kaba jur halor ka jingkiew ki kam dih drok ha ka jylla, u Sangma u la ong, “Ha kine ki snem ngi la ïohi ïa ka jingkiew ka jingpyndonkam ïa u drug. Kham ha shwa kam da long katta katta, hynrei mynta palat 3 lak ngut ki briew la ïoh jingtip ba ki la long kiba kyrni. Kane kam dei ka kam ban ïa rkhie, hynrei ka dei ka kam kaba shyrkhei ym tang ïa ka sorkar hynrei ïa baroh ki nongshong shnong.”