Shillong, Naitung 18 : Lah ban dei na ki dawai bih khniang ba synrei ha ki sohsaw kaba wanrah ïa ka jingiap jongka samla lud Shailynti Marngar ba dang 15 snem ka rta bad dang leit skul na ka shnong Mawriang Tyrnai hapoh ka Mairang Block.
Kat kum ka jingïathuh jongka Myntri ka tnad ka koit ka khiah I Dr Ampareen Lyngdoh i la ïathuh ba ki nongrep Sohsaw ha ki thaiñ Mairang ki pyndonkam da ki dawai bih khniang kiba khlaiñ bha ban synreit ne siat dawai ïaki sohsaw shwa ba kin ih.
Haba ïakren bad ki lad pathai khubor i la ïathuh ba mynta i dang ap ïa ka kaiphod jingtohkit kaba bniah da ki briew jongi khamtam ban tip bha ïaki dawai bih khniang ba la pyndonkam haba synreit ne siat dawai ïa ki sohsaw.
“ Ngin sa tip bniah kiei ki jait dawai bih khniang ba la pyndonkam ban synreit ha ki sohsaw tad ynda la ïoh ïa ka kaiphod kaba bniah. Ka daw ka long ba hynnin ka sngi ruh ka dei ka Sngi Shuti kumta ym lah ban pyndep ïa ka jingtohkit hynrei tang shu dep tohkit ki ophisar jong nga kin sa ai noh hi ïaka kaiphod bad hangta ngan sa lah ban ïathuh da kiei ki dawai bih khniang la pyndonkam da ki nongrep sohsaw ha ki thaiñ Mairang” ong ka myntri.
Ka Myntri kaba peit ruh ïa ka tnad ka rep ka riang ka la banjur ïa ki nongrep ban kiar na kaba pyndonkam ïa ki dawai bih khniang kiba ktah ïaka koit ka khiah namar ka jingbym nang ban antad ïa ka dawai ka wallam ka jingma ïa ki nongbam.
“ Ka la don ruh ka jingbthah ïaki nongrep ba ym bit ban bam mar mar ïa ki mar rep kiba la synreit jur ki dawai bih khniang la kumno kumno hap ap hapdeng ka 7 bad 10 sngi sa bam bad kata ruh da kaba sait khuid bha”ong ka myntri.
Ka la pynshlur ïa ki nongrep ba kin kham shim khia ka rep da kaba rep khlem dawai sboh.
I Shailynti Marngar i la khlad noh ha ka 13 tarik mynta u bnai hadien ba bam ïa u Sohsaw ha Mawriang, Tyrnai kaba hap hapoh ka Mairang Block.Ki kmie ki kpa bad ki para jong i ruh ki la ngat bih lang bad ki la hap shah sumar ha ki jaka sumar ba marjan. I Shailynti i la kem pang kyndit kyndit haba i dang don ha ïing tang bad u para bad haba la pynkit ïa i sha Nongum PHC i la khlad noh ha lynti.
Ka myntri ka la kular ba ka sorkar kan shim khia ïa kane ka kam hadien ba la ïoh ïa ka kaiphod khnang ban ïada ba kum kine ki jingjia kin ym jia shuh hadien habud.
