Jowai, Ïaïong 25 : Ka jingthmu jong ka sorkar lyngba ka tnad Jowai Municipal Board (JMB) ban leit theh ñuit ha kawei na ki jaka ba la khot ka Pangit kaba dang hap hapoh u pud u sam jong ka Dorbar Shnong Khliehtyrshi WJHD kaba jngai na surok bah Jowai-Shillong tang kumba 2 kilo miter eiei.
“Kane ka jingthmu leit theh ñiut ha katei ka jaka ka lah ban buh jingma ïa ka mariang lada khlem da pynshna bha ïa ka jaka” ong uwei na ki nongshong shnong ka sor Jowai uba dei ruh u President ka Khooid Ya Ka Wah Myntdu u ma K.L Pariat.
La ïathuh ruh ba ïa kane la khang pyrshah da ki nongshnong shnong jong ka Khliehtyrshi kiba la hap ban mih paidbha ha ka miet jong ka 22 tarik bad ka 23 tarik hadien ba u District Magistrate jong ka West Jaiñtia Hills ula dep ban pynjari da ka kyndon 144 Cr.PC hajan jong katei ka jaka.
Hynrei ki paidbah kila ïeng pyrshah ïa kane da kaba ym ailad haduh mynta ban thmu pynlong jaka theh ñiut ba shipor da ka tnad JMB ha katei ka jaka kaba dang dei jong ka Jaiñtia Hills Autonomous District Council (JHADC).
Ula ïathuh ba katei ka jaka ka don ha kliar jong u lum bad ha trai jong kane ka jaka ki don ïa ki pynthor kba bad ka wah Mynkrem kan dei ka ban shah ktah bha bad kane ka wah kan tuid sha ki bynta ka wah Myntdu.
Wat ka jingsma iwtung ka lah ban mih na katei ka jaka bad kan wanrah jingpang na katei ka jaka sha ki shnong bad ka lah ban shah ktah ruh ka Pynthor Kba na ka jingbeh ka lyer bajur ha kliar jong utei u lum.
La pynsngew ruh ba lada theh ñiut ha katei ka jaka ka lah ban bun jingeh nyngkong ïaka mariang khamtam ki khlaw ki btab kiba don hajan, lada nang buh shuh shuh ki ñuit ki lah ban hap syndon shapoh jong katei ka riat bad ka lah ruh ban ktah ïa ki jaka thuh jaka tep jong ki nongrep kiba don shatrai u lum.
Kumba long mynta ula ong ruh ba ka jingbret pathar ïa ki ñiut ha kylleng ki bynta jong ki jaka riat kum ha ka surok Thomas Jones kala jur bha bad kane ruh kan lah ban ktang ïa ki umbam umdih bad ka jingjaboh jong ka mariang.
