Lah ban ai sngewbha Khristmas ka sorkar ïa ki nong Sohra bad Shella da ka District

Shillong, Naiwieng 13 : Ka jingangnud jong ki paidbah ka Thaiñ Sohra bad Shella lehse kan sa urlong shen hadien ba la ïoh jingtip ba ka sorkar Jylla shen kan sa pynbna noh ïa ka Sohra kum ka District kaba thymmai jong ka jylla lehse ha shuwa ka ka jingrakhe Khristmas ka ban long ruh kum ka jingai sngewbha Khristmas ka sorkar ïa ki paidbah ka Sohra bad Shella Constituency.
La ïoh jingtip ba ka sorkar ka lah ban pynbna ruh sa kawei ka District sha Garo Hills ha ryngkat bad ka Sohra. Ki lad khubor ba la ïoh lum ki ïathuh ba mynta ka jingpynkhreh ka dang ïaid shaid shaid bad shen u Chief Secretary un sa khot noh ïa ki kynhun dawa District na ka thaiñ Sohra ban ïakren kham bniah halor kane ka kam khnang ba un ïoh ban phah noh sha ka sorkar ïa ka kaiphod katkum ka jinglap bad jingbishar bniah jong ka Committee kaba u lam khmat halor kane ka kam.
Kum ban shu pynkynmaw ba ka ishu dawa district ha Sohra kaba la kynjah jar naduh u snem 2018 ka la sdang shongshit biang sa shisien hadien ba ka ki heh ka NPP dang shen ka la leit ban khroh ïa uwei u riewpawkhmat na Sohra, u bah Alan West Kharkongor ban ïakhun ïa ka Election 2023 na kane ka party. Lah ban pynkynmaw ba na ka liang jong utei u rabngbah u la buh shuwa da ka ishu jong ka Sohra District shuwa ban un kohnguh. Katkum ki lad jingtip la sngewthuh ba ka jingïakut ka long ba une u rangbah un kohnguh ban ïakhun na kane ka party tang lada ka sorkar ka shimkhia biang ïa ka ishu Sohra District bad ruh ban pynïoh ïa ka jingangnud kaba la slem jong u paidbah katei ka thaiñ. U bah Alan West Kharkonor dang ha ka taiew ba la dep u la rung syndon sha katei ka party bad pynbna kum u kyrtong jong ka NPP na Sohra Constituency hadien ba U Myntri rangbah ka jylla, U Conrad K Sangma u la khot ïa ka kynhun jong ka Sohra District demand Forum(SDDF) ban ïakren ïaphylliew jingmut biang halor kane ka kam. Ka jingïakren ka long kaba seisoh khamtam ha kaba u la ong ba ka headquater jong ka District kan long beit ha Sohra/
Kum ban shu pynkynmaw, u bah Alan West Kharkongor u dei uwei na ki rangbah kiba la sdang ïa ka kynhun ba la tip kum ka Sohra District Demand Forum, (SDDF) bad naduh u snem 2018 kane ka kynhun ka la trei shitom bad duriap thop ban buh ïa ka jingdawa hakhmat ka Sorkar.
Ka ishu dawa District ha Sohra ka dei kaba la slem bha bad ha ka jingshisha ka Sohra ka la dei ban ïoh District shuwa ïa ka Mairang ruh . Ha katei ka por na ka liang jong u Myntri Rangbah ka jylla, U Conrad K Sangma u la ai daw ba ïa ka Sohra la buhteng shuwa shipor na ka daw jong ka jingbym ïahap bad ki jaka kiba kynthup sha Pynursla. Kane ka jingleh jong ka sorkar ka la pynjew mynsiem shi katdei eh ïa ki paid ka thain Sohra bad Shella kiba sngew ba ka dei tang ka jingleh ban pynsngewbha ïa u President bathymmai ka UDP, u bah Metbah Lyngdoh..
Ha ka jingïakynduh jong ka SDDF bad u Myntri rangbah dang shen na ka liang ki dkhot ki la ïohlad ban pynshai kdar ba ka Pynursla kam kwah satia ban ïadon bad ka Sohra bad ba dang ha u snem 2017 ka la ïoh ïa la ka Sub Division. Dang shen u Symbud Myntri rangbah ka jylla, u bah prestone Tynsong uba long ruh u MLA ka Pynursla u la kren shai ba ka Pynursla kan ym ïasnoh bad ka Sohra District bad ba ka la dei ka por ba ka Sohra bad Shella kin ïaid la ka jong ban thaw ïa ka District kaba thymmai.
Haba u nongthoh kotkhubor u la twad jongmut na ki katto katne ki paidbah na ka thaiñ Sohra, la sngewthuh ba bun hi na ka paidbah jong ka thaiñ Sohra mynta ki la sdang ban noh liang sha ka seng NPP bad lada dei ba katei ka jignangnud kan urlong noh shen, bun ki paidbah wat kiba la don ha kiwei ki party ruh kin phai khmat sha u kyrtong ka NPP naba ki lap ba ka jingïakhun jong u ïa kane ka elekshon 2023 ka don ka nongrim kaba skhem bad halor ka dawbah jong ki paid ka thaiñ Sohra bad Shella baroh kawei. La lap ba ka jingrung NPP jong u bah Alan ka la ïarap shibun eh wat ïa ka NPP Shella naba bun na kitei ki dong bad kyntoit kiba hap ha shnong Sohra ki hap mynta ha ka Shella Constituency ruh.
Na ka liang jong u Myntri Rangbah ka jylla ha ka jingïakynduh bad ki nongthoh kotkhubor dang shen u la kren shai ba ka jingdawa jong ka Sohra Distict ka long kaba shongnia bad mynta ka jingbishar ka dang ïaid shaid shaid khnang ba yn lah ban ai noh ïa ka rai kham kloi khamtam haba na ka liang jong u Synbud Myntri rangbah u la kren shai ba ka Pynursla Civil Sub Division ka hun ba ïaid la ka jong ban pyndap pynbiang shuwa ïa kane ka Sub Division kaba dang shen bad dang thymmai eh.