Shillong, Nohprah 06 : U General Secretary ka Khasi Students Union (KSU) u samla Donald V Thabah u la ong ba ka la dei ka por ba ka sorkar kan kyndang beit naphang ïa ki briew kiba sah ha Them Ïewmawlong.
U samla Donald V Thabah haba kren sha ki lad pathai khubor hynne ka janmiet sngi Balang u la ong ba ka la dei ka por ba ka sorkar kan pyni noh ïa ka bor ban ym kheiñ khun khatduh shuh ïa ki hynrei ban kyndang noh beit naphang.
“Ka jingïakren ban pynkynrïah ïa ki briew ba sah ha Them Ïewmawlong ka la sdang naduh u snem 1996 bad 2018 ha kaba ka la don ruh ka jingïakynad bad ka jingïap briew, hynrei haduh mynta ka sorkar kam pat weng. Kine ki kharmetor wat ïa ki khunlung khynnah ruh kim map shuh ki bom ki tied bad kam trai ruh ïa katei ka jaka,” ong u samla Donald.
“Ka sorkar naduh u snem 2018 ka la kular ba kan weng noh mardor ïa ki, hynrei kaba sngew lyngngoh ka long ba haduh mynta ka sorkar kam pat lah ban weng. Lada ngi peit ïa kiba shong die madan bad ïa kiwei kiwei ki para Khasi suk bha ban weng ïa ki, hynrei ïa kiba sah ha Them Ïewmawlong ka shu kut tang ha ka miej jingïakren,” la ong u samla Donald.
U samla Donald V Thabah haba jubab ïa ka jingkylli u la ong ba ka jingai por ka la kut hynrei ka la donkam ba ka Sorkar kan weng noh mardor namar lada ym lah ban weng kan sa mih biang ka jingïakynad hapdeng ki trai ri trai muluk bad kiba shong ha katei ka jaka.
Shuh shuh u la ong ba lada ka Sorkar ka kwah ban shu leh politik ïa kane ka issue ka la dei ban weng noh mardor namar kadei ka jingkwah jong ki paidbah.
Halor ka jingbym treh jong ki briew ban mih noh na katei ka ka jaka, na ka liang u samla Donald V Thabah u la ong ba ka Sorkar kam dei ban leh kyrpang ïa kiba kum kine ki jait briew. “Kine ki poi ei shi sngi ym tang ki khar metor hynrei wat kiwei ruh ki leh beit kumba kidei ki khun khatduh jong ka sorkar. Kumta ka sorkar kadei ban ïarap beit tang ïa ki trai ri trai muluk ym ban leh eiei kyrpang ïa ki poi ei shi sngi,” u la ong.
