Lada ym lah ban pynbiang ïa ki kot ki sla wat wan ïalam nongtrei bylla bar jylla:KSU

Shillong, Iaiong 05: Ka shnat trei kam ka KSU Western Border Area ka la leit ban jurip kynsan ïa ka jaka ba la pyntrei ïa ka skul EMRS kaba don ha shnong Umsohbar kaba hap hapoh jong ka jingpeit ka Block Jirang ha ka sngi 4tarik Iaiong 2026 kaba ka seng ka rakhe ïa ka sngi Kyrsiew Ri.
ïa kane ka jingleit ban jurip la ïalam da u samla Reserve Pator bad General secretary u samla Testar Thangkhiew bad ha ka jingdon lang ki dkhot ka seng na ki shnat trei kam kiba don ha katei ka thaiñ.
Ha kane ka jingleit jurip ka KSU ka la shem ba ym don wat tang uwei ruh u nongtrei ba don ïa ka Labour Laisen bad na ka liang jong ka seng ka la ai por shitaiew ïa u kontrator ban pynbiang ïa ki Labour Laisen.
Ha kane ka jingleit ka seng kala ong ba dei ban ai bylla ïa ki trai shnong ruh ha kane ka jaka bad ki shnong ba marjan bad ïa ki kam ban ap pahara dei ban ai ïa ki trai shnong kane ka long ba ki trai shnong ruh kin ïoh kam ïoh jam.
Ka seng ka la maham ruh ba lada kiba ïoh ïa ka jingtrei kim lah ban pynbiang ki kot ki sla kiba biang bad donkam kan bha ba kim dei ban wan ïalam nongtrei bylla bar jylla shapoh ka jylla. Ha kajuh ka por ka KSU ka la ong ba ki dei ban pyndep ïa ka jingtrei ha ka por kaba biang na ka bynta ka jingmyntoi ka thaiñ.
Ka KSU ka phah ïa kane ka khubor ïa baroh kiba wanrah nongtrei bar jylla ba ki dei ban pynbiang ïa ki kot ki sla bad ha kajuh ka por dei ban ai kam ïa ki trai shnong ïa kaba ki lah ban trei.