Lada ym don jingpynshisha, ym dei ban ai na ka pisa paidbah: HYC

Shillong, Rymphang 6: Ka Hynniewtrep Youths’ Council (HYC) watla ka sngewsynei ïa ki longïing kiba la shah ktah hynrei ka maham jur ïa ka Sorkar India bad ka Sorkar Meghalaya pyrshah ïa ka jingpynbna matlah bad ka jingpynbna kloi ïa ka bai lutksan ha kaba ïadei bad ka jingjia kaba la jia dang shen ha East Jaintia Hills District.
‘ Ka jingsiew bai lutksan khlem ka jingpynshisha kam dei ka jingsngewsynei hynrei ka dei ka jingpyndonkam bakla ia ka pisa paidbah ban pynkhuid ia ka jingleh be-ain bad ban ai khusnam ia ki jingjyrsieh ba buhrieh”
Ka HYC ka kren shai ba ym dei ban pyllait ia ka pisa paidbah lymda la pynshisha shwa ia ki jinglong tynrai, ka jingling nong India jong u nongkhlad noh katkum ki kot ki sla bad ki sakhi katkum ka jingtip ka jong ngi bun ba ki nongwan buhai shnong beain bad ki nongbylla ki dei ki bym dei ki trai shnong, kiba bun na ki, ki lah ban ym dei wat ki nongshong shnong jong ka ri India, ki kham bun kiba trei ha kitei ki jaka tih dewiong. Ka jingai bai lutksan khlem da pynshisha kam dei ka jingle isynei briew-ka dei ka jingbym kitkhlieh ha ka liang ka jingsynshar bad ka jingpyndonkam bakla ia ka pisa paidbah.
Ka ex-gratia ka mut na ka bynta ki nongshong shnong kiba long ki nongshong shnong ba pura, ym ban ai khusnam ne ban pynlong ain ia ka jingtih dewiong beain, ka jing wanlam nongtrei beain ne ka jingsah beain. Kano kano ka jingsiew kaba la leh khlem da pynshisha kan pynshlur ia kito kiba don bynta ha ki kam beain bad ia ki nongwan buhai shnong beain.
Kumta ka HYC ka dawa ban pynshisha ïa ka jinglong trai ri jong baroh kiba la khlad noh shwa ban mynjur ïa kano kano ka jingsiew bai lutksan bad ka jingtohkit ïa ki kam runar ban ithuh ïa ki trai par dewiong, ki kontraktor, kiba don shadien jong ka jingpynbthei be-aiñ bad ka ïa ki ialam ia ki nongwan buhai shnong be-aiñ shapoh ka Jylla.
Ka HYC ka pynpaw biang ba ka jingsngewlem kam lah ban pynduh ia ka rukom treikam kaba dei bad ka ain . Ka sorkar India bad Meghalaya ki dei ban shim ia ka jingkitkhlieh ym bas hu hun tang ban paw khubor ban pyni ba ki kylluid mynsiem. “Lada Ym don jingithuh, Ym dei u Trai Ri India, ym don jingpynshisha-te ym dei ban ai ka pisa paidbah”.
Kane ka long katkum ka kyrwoh khubor ba la pyllait da u Bah Kupar Synrem uba dei u President ka HYC.
Ha kawei pat ka liang ka The Hynniewtrep Integrated Territorial Organisation (HITO) kala leit buh da ka jingthoh sha u Lat ka jylla u CH Vijayashankar, ban dawa ban thung da ka kynhun tohkit da ka central investigation ha kaba ïadei bad ka jingïap na ka jingbthei ka krem dewiong ha East Jaintia Hills.
Ka HITO ka la dawa ïa ka jingtohkit da ka tnat treikam ba ha khlieh duh jong ka sorkar pdeng, kum ka CBI lane ka kynhun tohkit Special Investigation Team ba la thaw da ka sorkar India, ha kaba shim ïa ki ophisar na shabar ka jylla Meghalaya.
Ka dorkhas ka la kyntu ruh ïa u Lat ban pynthikna ïa ka jingpynshisha kaba donkam bad kaba shai ïa baroh ki briew kiba la khlad noh shwa ban pyrkhat ïa kano kano ka jingsiew bai lutksan ne ka jingpynlait na ka bynta ka ex-gratia, da kaba kdew ïa ka jingsngewkhia ba bun na kiba la khlad noh ki lah ban dei ki nongshong shnong jong ka ri Bangladesh.