Shillong, Nohprah 04 : U Nongïalam ka Trinamool Congress bad Myntri Rangbah barim ka Jylla, Dr. Mukul Sangma ha ka sngi Balang u la ong ba ka NPP ka jop ïa ka elekshon ha Gambegre tang namarba ka dei ka elekshon shiteng samoi.
“Lada kam dei ka elekshon shiteng samoi, ngi lah ban jop mangi (TMC),” ong u Dr. Mukul haba kren bad ki lad pathai khubor.
Kumban shu pynkynmaw, ka kyrtong jong ka TMC, ka Sadhiarani Sangma ka la shah pynliem noh ha ka kurim jong u Myntri Rangbah ka Jylla, ka Dr. Mehtab Chandee Sangma ha kane ka elekshon shiteng samoi kaba dang shu lah shen ha Gambegre.
Haba jubab halor ka jingkylli u Dr. Mukul u la ong, “Kam dei satia ba ka don kano kano ka jingbakla. Phi dei ban pyrshang ban wad ïa kaei kaba jia, nga ieh ïa kane ka jingkylli ha phi. Kan bha lada phi buddien lut ban tip khambha shuh shuh halor kane khnang ba phin tip kaei kaba jia ha kane ka elekshon.”
Nalorkata, u ong ruh ba kaei kaba jia ha ki 20 snem bad kaei kaba jia mynta ka la ïapher baklybak. U ong ruh ka elekshon jied nongmihkhmat ha kine ki snem mynta ka la shah pynkyllaiñ da kiba bun ki buit ki lad ha kaba ki seng saiñpyrthei ki pyndonkam la ki jong ki jong ki buit treikam.
“Kumta, kine ruh ki dei ki katto katne ki daw kiba nga ruh nga la peit-thuh bha kumta ngi la tip kumno ban leh,” u la bynrap biang.
