Lada wanrah ïa ka FCRA Amendment Bill, kan ailad ïa ki jylla ban shimti ïa ki nongkynti kiba seng lehkam isynei: VPP

Shillong, Ïaïong 06: Ka Voice of the People Party ka la phah da ka shithi sha u Myntri Rangbahduh ka ri u Narendra Modi halor ka jingai jingmut haba ïadei bad ka jingtyrwa jong ka sorkar pdeng ban wanrah ka jingpynkylla ïa ka FCRA Amendment Bill, 2026 kaba la thmu ban wanrah shen.
Ha ka shithi ba la soi da ki President ka seng u Bah Ardent Miller Basaiawmoit kaba la ai khublei Easter ka la pynpaw ruh ka jingsngewkhia kaba jur halor ka jingtyrwa ban pynkylla ïa ka Foreign Contribution (Regulation) Act (FCRA) 2026 kaba dang don mynta hapdeng ka jingpyrkhat.
“Ha kaba nyngkong ngi pynpaw ka jingïaroh ïa ka sorkar pdeng kaba la wanrah ka jingtreikam kaba khuid kaba shit ba shai bad ka jingshong shngaiñ jong ka ri haba ïadei bad ki kam nohsynniang kiba wan nabar ri. Hynrei ki don pat katto katne ki kyndon kiba la ong ba la tyrwa ha kane ka jingthmu pynkylla ka la saphriang ka jingsngewkhia hapdeng ki seng hapoh ka imlang sahlang, kyrpang kito kiba don bynta ha ki kam lehisynei, ki kam pule puthi bad ki kam ka longbriew manbriew. Ka jingsngewkhia kaba kongsan eh kadei ka kyndon kaba pynlah ïa ka jylla ba kan shimti ne ban pynïaid noh ïa ki nongkynti jong ki seng kito kiba la shah pynduh noh ïa ka registration hapoh ka FCRA,” ong ka shithi na ka VPP da kaba pynpaw ruh ba watla kane ka long kaba kongsan ban don ki kyndon, hynrei ka long pat kaba kongsan naba kum kane ka bor kaba khlaiñ ba la ai sha ki jylla ka la wanrah ki jingkylli kiba khraw shaphang ka jingnujor, kaba dei ka rukom pyntreikam bad kaba lah ruh ban mih ka jingpyndonkam bakla.
Ka shithi ka ong ruh ba bun na ki jaka pule khamtam ha kane ka thaiñ shatei lammihngi ba kynthup ïa ka Meghalaya kiba la dep seng da ki phew snem lyngba ki kam ba shong aiñ bad kiba la shakri kum ki païa na ka bynta ka bha ka miat ka imlang sahlang ha ki jaka, kum ha ka pule puthi, ka koit ka khiah bad ki kam pynroi ha ki thaiñ nongkyndong.
Ka la ong ruh ba ka long kaba donkam ruh ban pynpaw ba bun na kine ki jaka pule ne jaka treikam ki dei kiba la pynïaid da ki kynhun jaitbynriew ba ritpaid, kynthup ki seng ki Balang Khristan, kiba naduh ki khana pateng ki la leh ïa ka kam kaba kongsan ban sam bad ai ki kam shakri sha ki kyndong kynshrot bad ki thaiñ kiba la shah ieh bad kano kano ka polisi kaba la wanrah kaba thaw ïa ki jinglong bym thikna haba ïadei bad ka jinglong trai bad ka jingpynïaid ïa kum kine ki jaka treikam ki lah ban wahrah jingthut ïa kine ki kam shakri bad kan ktah ïa ka bha ka miat, ka hok bad ka roi ka san jong ki nongïoh myntoi kiba ym lah shuh ban ñiew.
“Ha ka jylla kum ka Meghalaya, ha kaba ki non governmental organization (NGO) ki pyrshang ban leh ki kam shakri halor ki kam pynroi pynsan, ki jinglah ban pynmih ïa ki sienjam kiba pyrkhing ne kiba eh kin lah ban ktah ïa ki jingsdang naduh tynrai bad kin pyntlot ïa kine ki jaka treikam jong ki rit paid. Ngi sngewkhia ba ki jingtyrwa kyndon, lada pyntreikam khlem ki lad jingïada ba biang, ka lah ban lam sha ki jingjia bym lah ban khmih ba lah ban leit shalyndet kine ki jingthmu ba la ïathuh bad shalyndet jong ki kyndon,” ong ka VPP ha ka shithi.
Ka VPP ka la kyntu ïa ka sorkar pdeng ba kan pyrkhat biang ïa ki kyndon ban shimti ne ban pynïaid ïa ki nongkynti jong ki seng, da kaba pynthikna ba ki hok nongkynti bad ka jinglong laitluid ki jaka treikam ki dei ban ïoh ki jingïada kiba biang.
Ka la ong ruh ba dei ban pynthikna ba kino kino ki kam pyrshah ïa ki seng dei ban ïalam ne kdew lyngba ki nongrim jong ki hok ne natural justice, ka jingtreikam kaba shit ba shai bad ki rukom treikam kiba shai bad ban don ruh ka jingïasyllok bad ki riewshemphang ki nongshong shnong, kynthup ki nongmih khmat na ki seng ka imlang sahlang, ki jaka treikam ki rit paid bad ki jylla ka thaiñ shatei lammihngi kynthup ïa ka Meghalaya ha shwa ban rai khatduh ïa ki jingpynkylla.
Ka VPP ka kyntu ruh ba dei ban wanrah ïa ki lad jingïada ban pynthikna ba ki kam leh isynei bad ki kam pynroi jong kito kiba la leh ïa kine ki kam la slem bha kim dei ban shah ktah.
“Ngi ngeit ba kan don ka rukom treikam kaba biang lang kaba lah ban kynjoh ïa ka thong ban ïada ïa ka bha la miat ka ri bad kumjuh ruh ban ïada ïa ki kam nohsynniang ki seng ban tei ïa ka ri bad ngi kyrmen ba ki jingsngewkhia jong ki paidbah, khamtam na kito ki thaiñ kiba sha kyndong kin ïoh lang ïa kane ka jingpyrkhat kaba bha,” pynkut ka shithi ba la soi da ki president ka VPP.