Lada wan lei sa ka lynti rel ym tip shuh shano kan ïalam bad kaei ban sa jia, ong ka JNC-CEC

Khliehriat, Nailur, 17: Ka Jaiñtia National Council Central Executive Committee (JNC-CEC), lyngba u kyrwoh ba la phah da u Publicity Secretary, u bah Mebanteilang Sukhlaiñ, ka seng ka pynpaw ïa ka jingbym sngew ïahap wat tang khyndiat ruh halor ka jingkren laplah bad kaba la sngew kum ka jing kren thamula u myntri jong ka ka Food Civil Supply jong ka jylla, u bah Comingone Ymbon uba la ong ba ka jingkiew ki mar bam ka dei na ka jing bym don ka lynti rel.
“Ka seng ka buh ka jingkylli ïa u myntri ka sorkar jylla u bah Comingone Ymbon, hato lada ym don lynti rel ka mut ba ki mar bam kin shu ïai kiew beit kumne mo?. Ka seng ka suba jur ruh ba ioh don kaei re kaei sha lyndet kaba ka sorkar ka thmu ban leh ha ba shim na kito ki jingkren jong u myntri” ong u kyrwoh.
“Kum ban shu pynkynmaw ba ka seng hi naduh ki por ba mynshwa ka ju maham tyngeh ban wanrah ïa ka lynti rel ha ri lum Jaiñtia namar tang kito ki kharkhana ba lah don lypa ruh kim lah ban ai ka jingshakri kaba biang ne ka jingmyntoi ïa ki nongshong shnong ka thaiñ, lada wan lei sa ka lynti rel ym tip shuh shano kan ïalam bad kaei ban sa jia, nalor ki aiñ ki kanun ruh haduh kat mynta kim pat shym la urlong satia kum ka Inner Line Permit bad ka MRSSA kiba long ki paia ba radbah ki ban iada ïa ngi na ka jingwanrung kyrthlep ki briew kiba na bar”
“Ym lah ban len hooid ka ju don hi ka jingkiew ka jinghiar ha ki dor jong ki mar bam mar dih na ka por sha ka por katkum ka jinglong jingman jong ka mariang ne ka por hynrei ban shu ai daw ba tang na ka jing bym don ka lynti rel ka pynlong ïa ki mar ba kin kiew dor te ïa kane hi ngim sngew lah ban pdiang da lei lei ruh, kane ka dei beit tang ban tep eit miaw lane ban ïada ïa ka jingbym lah ban tehlakam ïa la ka jong ka tnad (Supplies). Ka Don ka jingsuba ruh ba ki dei hi ki briew jong ka sorkar kiba pynthut ïa ka ïaid ka ieng ki kali kit mar ba pynlong ban kiew dor ki mar, bad ïa kane mano ban kitkhlieh?” bun jing kylli ka seng.
“Ha kajuh ka por na ka liang ka Jaiñtia National Council ka phah ruh ïa u kyrwoh sha ki paidbah bad khamtam sha ki paidbah jong ka ka East Jaiñtia Hills District kaba ka sorkar ka thmu ban wanrah ïa ka lynti rel na kane ka district ba horkit hordang ngi ngim dei da lei lei ruh ban shah ialam bakla ne shah pynthame ha ki kam buitpoh jong ka sorkar. Katkum ka khubor kaba ka seng ka la lap ba ki don ki briew jong ka sorkar kiba pyrshang ban ïalam bakla ïa ki paidbah da kaba ong ba lada wan ka lynti rel hangne ha thaiñ jong ngi kin sa bun kiba nabar ki ban thied ïa ki mar ki mata ki jong ngi bad kan pynsuk ruh ïa ka kamai kajih ka jong ngi, bad ban wanrah ruh ïa ki marbam mar dih kiba nabar ha ka dor kaba tad, hynrei ha ngi hi ngi dei ban long kiba stad bad na sian bad ban nym shah pynbeij shuh ha kita kiba kam ïa lade ba ki dei ki briew jong ka sorkar ne ki Agency jong ka sorkar” la bynrap shuh shuh ka seng
“Ka jylla ka jong ngi ka don shibun bah ki nongrep, kiba rep ïa shibun ki jait mar bam mar dih, hynrei ngim juh iohi ba ka sorkar kan wad ïa ki lad ki lynti ban ïada bad ban kyrshan ne ban ai jingmyntoi ïa ki bad kane hi ka dawbah ba ka jylla jong ngi ka hap ban shaniah marbam na kiwei pat ki jylla. Ka seng kadon ka jingsuba kaba jur ïa ka khubor ba sop sop jong ka sorkar ba kan sa wanrah bun tylli ki kharkhana dew bilat sha kito ki jaka kiba ka ba thmu shna ïa ki lynti rel bad lada kane kan jia kaba mut ba ka sorkar kan pynsuk tang ïa kito ki kharkhana, katba ïa ngi ki paidbah ngin sa shah thombor biang ha ki nongwei kiba nabar ki ban wan tang ban kjit ïa ka spah mariang ka jong ngi, shaei ka lawei ki khun ki kti ki jong ngi haba kumta kan jia aiu ïa ngi?. imat kato ka jingkren jong u myntri ba ka jingbym don ïa ka rel sa kiew ki mar bam kadei kaba lah plan lypa da ka sorkar”
“Kyntang ïawai ka seng ka phah ka khubor kaba shai sha ka sorkar ba kan klet noh shisyndon ïa ka jingthmu ban wanrah lynti rel ha ri lum Jaiñtia bad ban wad noh pat da kiwei ki lad ki lynti ban tehlakam ïa ka jingkiew dor ki mar bam ym ban pynksan tang ha ki rynsan ban pynkylla ïa ka jylla shakata ka $10 billion Economy State haba tang ïa ki jingeh hapoh jylla ruh ym lah ban saiñdur haka rukom ban pynsuk ïa ki nongshong shnong khamtam ïa u kup shiliang u sem shiliang,” pynkut u kyrwoh.