Lada wan ka AITC ha ka bor, yn ai jingïarap T. 1000 shibnai ïa ki kynthei ha Meghalaya

Shillong, Nohprah, 13: Ka nongïalam ba hakhlieh duh jong ka All India Trinamool Congress (AITC) ka Mamata Bannerjee ha ka sngi Baar ka la pynbna paidbah ban pyntreikam ïa ka Meghalaya Financial Inclusion for Women Empowerment Scheme (MFI-WE Scheme) ha ka jingïalang kaba la long ha Soso Tham Auditorium.
Ïa kane ka skhim ka AITC kan pyntreikam lada ka ïohbat ïa u lakam synshar ha kane ka Jylla Meghalaya hadien ka elekshon sha ka Ingdorbar Thawaiñ ka Jylla ka ban sa long ha u snem 2023.
Lyngba kane ka skhim ka Trinamool Congress ka la kular ban ai jingïarap T.1000 hajar shi bnai (12000 hajar shi snem) sha ki kynthei jong kawei pa kawei ka longiing ha kane ka jylla Meghalaya kaba long kum kajuh ka jingpyntreikam ïa ka Lakshmir Bhandar Scheme ha ka jylla West Bengal ha kaba 1.8 klur ngut ki kynthei ki la ïoh jingïarap lyngba kane ka skhim.
Ka la bthah ruh ïa ki nongtrei jong ka TMC ban pynthikna ba kane ka skhim ka dei ban rung sha manla ki thliew iing jong ka Jylla.
Ïa kane ka skhim la pynbna paidbah da ka Mamata Bannerjee lyngba ka Video Documentary kaba la pyni shaphang ka rukom pyntreikam bad ka jingai jingkyrshan pisa ïa ki kynthei ha ka jylla.
Manla ki kynthei khlem da kheiñ na kano kano ka kyrdan, la ki dei ki longkmie ba kit khun rei, ki longkmie ba shong iing, ki thei ïap tnga bad ki kynthei kiba trei ba ktah ki lah ban ïoh ïa ka ID WE Card khnang ba kin dup ïoh ïa kane ka skhim.