Lada u Myntri Rangbah um sngap ïa ka sur ki paidbah u hap ban kit khlieh lada jia eiei: B. Riangtem

Nongstoiñ, Ïaïong 17: Naduh ba ki ar ngut ki Myntri Rangbah u Conrad Kongal Sangma bad u Himata Biswa Sarma, ki la pynbna ba ki la dep ïasoi ïa ka soskular pynbeit pud ha Delhi hakhmat u Amit Shah, ha kaba ki khatwei tylli ki shnong ha ka thaiñ Malangkona kiba dang hap hapoh u pud u sam jong ka hima Nonglang Sirdarship ki la shah khynñiat noh sha Assam, ki paidbah jong katei ka thaiñ kim pat sangeh ban pynlong ïa ki jingïalang paidbah, ban pynpaw ïa ka jingpyrshah ïa katei ka soskular bad ban dawa ba dei ban pynthymmai biang bad ban pynïoh ïa ka hok jong ki kum ki nongshong shnong ba pura jong ka jylla Meghalaya.
Ha ka 16 tarik mynta u bnai kaba dei ka sngi saitjaiñ, ki nongïalam ka Federation of Khasi Jaiñtia & Garo People West Khasi Hills, ki la hiar sha katei ka jaka pyntip ban twad jingmut halor ka jingbym hun jong ki ïa ka soskular ba ki ar ngut ki Myntri Rangbah, ki paitbah na katei ka thaiñ naduh ki rangbah, ki longkmie bad ki samla ki la ïa tuid ban sngap kaei kaba ki nongïalam ka seng ki don ban ong.
Ha katei ka sngi la pynlong ïa ka jingïalang ha madan jong ka Malangkona Higher Secondary School ha Siminaguri, ha kaba la pynïaid da u bah Somit K.Sangma vice president ka Joint Action Committee Malangkona Border Area ha kaba ki rangbah kiba la ai jingkren ki long u Headman ka Tarabari u bah Enos G.Momin, u bah Jedick Sangma Headman barim ka shnong Huwapara, u bah Sakhar Riangtem Headman ka shnong Joypur, u bah Carry Oscar Kharmuti General Secretary ka FKJGP West Khasi Hills bad u bah Birbor Riangtem Secretary ka hima Nonglang Sirdarship.
U bah Carry Oscar Kharmuti haba ai jingkren ha katei ka sngi, u la ong ba hadien ba ki nongïalam jong ka seng ka la ïoh jingtip ba ki paitbah katei ka thaiñ kim hun satia ïa ka soskular ba ki Myntri rangbah ki la dep ïasoi ha kaba ïadei bad ka jingpynbeit ïa u pud u sam. Kumta, na ka bynta ban tip ïa ka jingshisha ki la pyntip sha ki rangbah shnong ba kin leit ban ïakynduh ïa ki ban ïaphylliew jingmut bad ban thaw ki lad ki lynti kumno kin leh.
Ka long pat kaba phylla haba ki la poi ha katei ka jaka ba ki paitbah shynrang bad kynthei ki la ïa mih da ka jingsngewkhia ban pynpaw ba kim kwah dalei lei ban leit sha Assam. Halor katei ka jingshisha ba ki paitbah ki la pynsngew bad pynpaw ha katei ka sngi, u bah Kharmuti ryngkat ki para nongïalam ki la ai mynsiem ïa ki paitbah ka thaiñ, ba ki dei ban ïeng skhem ban dawa haduh ba kin da ïoh ïa ka hok jong ki.
U la ong ba na ka liang ka seng kan ai ka jingkyrshan ba pura bad kan leit ban ïakynduh ruh ïa u Myntri ranbah ka jylla, ban dawa ba u dei ban ïasoi biang da kawei pat ka soskular ban pynthymmai ïa u pud u sam bad ban kynthup biang ïa ki khatwei tylli ki shnong hapoh Meghalaya.
U bah Birbor Riangtem Secretary ka hima Nonglang Sirdarship bad kum u nongpeit nongkhmih ïa ka synshar khaddar hapoh ka hima, haba ai jingkren u la ong ba ki kynrum kynram kiba mih na ka jingïasoi jong ki ar ngut ki Myntri Rangbah ïa ka soskular pynbeit pud hapdeng ka Meghalaya bad Assam, ka dei namar ba ïa ka District Council, ki Nongsynshar hima bad ki rangbah shnong, ym shym la kynthup lang ha ka Regional Committee on Border Dispute bad dei na kata ka daw ba ki Mynri Rangbah ki nud ban ïasoi ïa ka soskular. Ha kajuh ka por u la ong ba katba ka sorkar kam pat sngap ïa ka jingdawa ki paitbah kin ym sangeh ban dawa.
U bah Riangtem u la ong ba ha kine ki sngi ka jingïakawang ktieh hapdeng u Myntri Rangbah barim u Dr Mukul Sangma bad u Myntri Ranbah ba mynta u Conrad Kongal Sangma, lyngba ki lad pathai khubor bad ki Social Media, ka jur haduh katta katta ha kaba u Conrad Kongal Sangma u pynksan ïalade da kaba kam ba ïa ka soskular pynbeit pud la bud thik katkum ka map ba la dro bad mynjur da ka sorkar MUA II ha u snem 2011 ha ka por ba u Dr Mukul Sangma u long u Myntri Rangbah.
Katba u Dr Mukul Sangma pat u pynksan ïalade da kaba ong ba ka jingïasoi ïa ka soskular pynbeit pud khlem ka jingmynjur jong ki Nongsynshar hima bad ki paitbah nongshong shnong ka long pyrshah ïa ka mon u paitbah.
Ha kaba ïadei bad katei ka mat, u bah Riangtem u la ong ba ha ka jingshisha lada u Conrad Kongal Sangma u ong ba ka map ba la dro ha ka por u Dr Mukul Sangma ka dei ka ba bakla, u la dei ban pynbeit ym ban shu ngeit ïa kaba bakla. U Dr Mukul Sangma ruh ha ka jingshisha shuwa ba un phah dro ïa ka map, u la dei ban khot lang ïa ki nongsynshar hima bad ki rangbah shnong ban ïa bishar lang ïa ka map bad ban pynshai sha ki paitbah la ki hun ne em.
U bah Riangtem u la ong ba kumba ka ktien ki riew shemphang ka ong ba ka sur u paitbah ka dei ka sur u Blei, ha kaba u la kyntu jur ïa ka sorkar la dei ban sngap ïa ka jingdawa jong ki paitbah. U la ong ruh ba katba ki paitbah ki dang pynlong ïa ka jingïakhih da kaba jai jai, ka dang biang ïa u Myntri Rangbah ba un pyrkhat bniah halor katei ka kam. Namar lada kim sngap ïa ka jingdawa ki paitbah, khlem artatien kan mih ka huri hura kaba lah ban poi shaduh u pud jong ka jingïamynsaw ruh. Lada kitei ki jingeh kin mih ha katei ka thaiñ u Myntri Rangbah u hap ban shim ïa ka jingkitkhlieh.