Lada u ma Aibor un jop MDC ki kam ba um lah trei ngan ïarap ma nga ong u ma Sniawbhalang Dhar

Jowai, Rymphang 17: Ha ka jingïalap elekshon ïa u kyrtong jong ka Party NPP u ma Aiborlang Shadap na ka 12 Barato-Mukroh Constituency, na ka liang jong u ma Sniawbhalang Dhar ula ong ba lada u ma Aibor un jop kum u MDC bad um lah ban trei dep ia ki kam, ngan sa ïarap trei lang ma nga ban ïoh pyndep na ka bynta ka jingmyntoi jong u paidbah ka Constituency bad ka thaiñ Khappud baroh.
Ïa kane u ma Sniawbhalang Dhar, Dy. Chief Minister ka jylla ula kren ha ka jingïalang kaba la pynlong ha shnong Mukroh mynta ka sngi. Ha kane ka sngi la ïadonlang ki rangbah nongïalam ka Party NPP, kumjuh ruh la wan ban ïadon ryngkat da u Prof. Dr. Henry Lamin ryngkat ki hajar ki paidbah nongkyrshan jong u ma Aiborlang Shadap.
Ula ïaroh ruh ïa ka jinglong jong u ma Aiborlang, da kaba ong ba u long u briew uba duna ka jingkren, kumba ïohi hapoh ka ïing Dorbar ka JHADC, hynrei u long pat uba smat ba sting ban leh da ka kam, ha ka jingïadei bad ka jingbha jingmiat jong ki nongshong shnong kane ka thaiñ.
Shuh shuh ha ka jingkren jong u ma Sniawbha ula khot bad kyntu ïa ki paidbah nongthep vote jong kane ka Constituency ba kin pynjop donburom biang sa shisien ïa u ma Aiborlang Shadap. Ula ong ba lada u ma Shadap u jop un long thik kum kato ka kali kaba don ar tylli ki engine. U la nujor ruh da kaba ong ba ka kali kaba don ar engine ka kham khlaiñ shibun ban ïa kato kaba don tang kawei ka engine.
U ma Sniawbha u la khot ïa baroh ki nongthep vote ba kin ïamih dangstep ha ka sngi thep vote kata ha ka 21 tarik mynta u bnai, bad ban thep ïa ka vote ba kordor jong ki ha ka shap jong ka Kot.
Da kaba u ong artad ba ka jingpynjop ïa u ma Aiborlang kan long ka jingmyntoi ïa ka thaiñ hi baroh kawei, namar ba un don ha ka liang jong ka sorkar kaba dang pynïaid ïa ka jylla kata kadei ka NPP sa kumba 3 snem nangne shakhmat.