Lada u DC u plie ïa ki tala jong ka toll gate, u dei ban shim ruh ïa ka jingkitkhlieh’:KSU-EJHD

Khliehriat nailar 4: Halor ka jingbthah u Deputy Commissioner, East Jaiñtia Hills District, u Abhilash Banarwal, IAS, ïa ki dkhot jong ka Khasi Students Union East Jaiñtia Hills District ba ba kin pyrkhat noh ha kaba ïadei bad ka jingkhang tala ka seng ïa ka jaka khrong khajna, ka Toll Gate jong ka NHAI kaba don ha Lumshnong, kaba la leit khang tala da ka KSU East Jaiñtia Hills naduh ka 28 tarik u naitung 2022 bad haduh mynta ruh ka dang bteng, mynta ka sngi ki dkhot ka seng ki la ïakynduh bad u Additional Deputy Commissioner, EJHD, u bah Jonathan Shylla bad ki la ïakren sani bha ha kaba ïadei bad kane ka kam.
Ha ka jingiakren jong ki dkhot ka KSU East Jaiñtia Hills bad u ADC, u bah Jonathan Shylla, ka jingiakren ka khlem poi shano shano ruh, ha kaba watla na ka liang ki bor District ki la kyrpad ban weng noh ïa ki tala ba ki la khang hynrei ki dkhot ka seng ki la pyn eh beit da kaba ong ba ka NHAI ka dei ban pyni shwa ïa ki dak ki shin ban maramot ïa ka surok.
U bah Jonathan Shylla, u la ïathuh ba na ka liang ki bor District ki la ïaleh katba lah bad ki la bud dien ruh bad ïakren bad ki heh jong ka NHAI ki la dep phah ruh da ki jingthoh sha ka NHAI ban maramot noh ïa ka surok bad kat haduh mynta ki dang ïai bud dien, u bah Shylla la ai ruh da ka jingthoh sha ka seng kaba pynpaw ba ki bor district ki khmih lynti ba ka NHAI kan sa leh ïa ka kam kumba la buh por.
Na ka liang ki dkhot jong ka seng kim sngew hun satia ïa katei ka jingthoh ba ki la ioh na u ADC bad ki la shim ïa ka rai ba kin dang ïai bteng hi kumjuh ïa ka jingkhang tala ïa ka Toll Plaza ha Lumshnong.
Ha kaba ïakren bad u Mawphor, ki nongïalam ka KSU East Jaiñtia Hills District Unit ba kynthup u President, u bah Streamly.S.Suchen bad u General Secretary, u bah K.S.Suchiang ki la pynpaw bad ong ba “Lada ka ophis u Deputy Commissioner East Jaiñtia Hills District ka leit ban plie jubor ïa ki tala, u Deputy Commissioner bad ka ophis ki dei ban shim ïa ka jingkitkhlieh, namar ngi na ka liang ka seng ngin nym weng ïa ki tala tat haduh ba ka NHAI kan da maramot ïa ka surok”
U bah Streamly.S.Suchen, u la ong ba “Na ka liang jong ngi hi ngin ïai don ryngkat beit bad ki paidbah ka East Jaiñtia Hills District bad baroh ki paidbah kiba ju iaid lyngba na kane ka surok NH-6, kiba ju kynduh jingeh ha ka leit ka wan, ngi kyrpad ïa u DC ba um dei ban pynsngewbha tang ïa ka NHAI, haba u wan ban long kum u DC jong ka East Jaiñtia Hills District u dei ban don ryngkat bad ki paidbah jong ka district, um dei ban ïaid lait na ki paidbah bad kane ka dei ka jingkyntu na ka liang ka seng, kumjuh ruh ka seng ka kwah ba u DC u dei ban bthah ïa ka NHAI ba ka dei ban maramot noh mardor ïa ka surok , katno ngut shuh ki mynisem ki la shu duh ei na ka daw ka jingsniew kane ka surok, khamtam ki ju jia ruh ki jingiatyngkhuh kali kaba ju jia, ka jingkylla ki kali, kumta ngi kyntu ïa u DC ba u dei ban pyrkhat bha ban pynsngewbha nyngkong eh ïa ki paidbah ka district na ka bynta ka bha ka miat jong ki paidbah bad u dei ban kyntiat mardor ïa ka NHAI”
Utei u nongialam, u la pynsngew ruh ba ka seng ka kyntait mardor ïa ka jingbthah u Deputy Commissioner East Jaiñtia Hills District, uba la kyntu ïa ka seng ban plie ne weng noh ïa ki tala na ka Toll Gate Plaza “Na ka liang jong ngi ngim pat lah ban plie ïa ki tala kiba ngi la khang naduh ka 28 tarik u naitung bad haduh mynta ka dang ïai bteng namar kane ka jingleh jong ngi ka long halor ka nongrim ba ka jingsniew ka surok ka la long shaba palat”
U bah K.S.Suchiang u la ong ba “ Ngi kren shai hangne ba lada ka ophis u DC ka plie ïa ki tala na ka ophis jong ka Toll Gate, ka jingkit khlieh kan leit sha ka ophis u DC, na ka liang ka seng kan nym shim ïa ka jingkit khlieh” u la ong ruh ba ka seng ka la dep pynpaw ha u ADC ba kumba ka seng ka la shim ïa ka rai ba ka seng ka lah ban ailad ïa ka NHAI ba kan plie ïa ka ophis ba ki lah ban trei ïa ki kam ophis jong ki tangba ka seng kan nym ailad pat ban khrong khajna na ki kali kumba ki ju lum , kumjuh ruh kumba ka seng ka la dep shim ïa ka rai naduh myn ka 28 tarik u naitung kaba la rai ba lada ka NHAI kam pat trei ïa ka kam kumba 70 percen ka jingmaramot ka seng kan nym ailad ban lum khajna ha katei ka Toll gate kaba don ha Lumshnong