Lada treikam kawei ka Ri kawei ka Election shen yn sa sdang kawei ka Ri kawei ka Niam : Nongïalam Seng Bhalang
Dei ka buit pynbieit election Lok Sabha ka BJP
![](https://mawphor.com/wp-content/uploads/2022/05/mawphor-1.jpg)
Shillong Nailur 06 : Ki Nongïalam jong ki Sengbhalang ki la pynpaw ïa ka jingsngewpyrshah kaba jur ïa ka jingthmu jong ka sorkar National Democratic Alliance (NDA) ba ïalam da ka Bharatiya Janata Party (BJP) ban pynkylla ïa ka kyrteng jong ka ri na ka ‘India’ sha ka ‘Bharat’ haba kynthoh ba kane ka dei tang ka buit elekshon ban pynbiej ïa ki nongthep vote kiba dei ki riewngeit Hindu.
Kine ki Nongïalam Sengbhalang ba kynthup ïa ka Khasi Students Union (KSU), Federation of Khasi Jaintia & Garo People (FKJGP) bad ka Hynniewtrep Youth Council (HYC), ki la pynpaw ruh ba kane ka dei ka sienjam ba nyngkong jong ka Sorkar BJP ha shuwa ba kan pynbud ïa kiwei pat ki buit barieh namar lada ka lah ban pynkylla shwa ïa ka Ri India kum ka ‘One Nation,One Election’ (kawei ka Ri kawei ka elekshon) shen kan sa leh ïa ka ‘One Nation, One Religion’ (kawei ka Ri kawei ka Niam).
U President ka HYC u Bah Robert Kharjahrin ula ong, ba ka kyrteng ka India ka dei kaba mih na ka Sanskrit katba ka ktien Bharat ka wan hi na ka ktien Sanskrit tangba ka noh bha sha ka niam Hindu.
“Katei ka jingthmu ban pynkylla na ka India sha ka kyrteng Bharat, kam don jingmut eiei hynrei ka dei tang ban pynkhih win bad kan shu pynkulmar kai ïa ki paidbah namar ha ka riti synshar ka ri la shah ban pyndonkam lang ïa kitei ki artylli ki kyrteng” ula ong.
“Ha nga shimet nga kham jied ia ka kyntien India namar ka dei kaba lah ban pdiang bad kam ïasnoh bad kano kano ka niam katba ka kyntien Bharat ka la snoh lypa sha ka niam Hindu” ula kynthoh.
Ula ong, ban pynkylla ïa ka kyrteng jong ka ri yn hap ban rah da ka Bill bad hap ban ïoh ïa ka jingmynjur kaba 2/3 Majority bad yn hap ruh ban phah sha ki sorkar jylla ba donkam ban iïoh haduh 50% ïa ka jingmynjur na ki sorkar jylla.
“Ka jingthmu ban wanrah ïa kane, ka dei ruh ban pynkylla ïa kane sha ka mat ïatai bad ba ki paidbah kin klet noh ïa ki ishu kiba kongsan, ban klet noh ïa ka jingkiewdor ki mar ki mata, ka jingbym ïohkam ïohjam, ka kam bamsap bad kiwei kiwei bad ba ki briew kin kyndeh ïa ka elekshon da kaba leit ha ka jingsngewniam” ong u Bah Robert.
U President ka FKJGP Bah Dundee C Khongsit ula ong, ba kane ka jingthmu ka Sorkar National Democratic Alliance (NDA) kaba ïalam da ka BJP ka dei tang ka jingthmu politics namar bala jan ka elekshon.
“Ka dei tang ka jingthmu politik namar ba la jan ka elekshon bad ba ka BJP kan ïoh ban thied ïa ka vote jongki riewngeit Hindu” ula ong haba pynpaw “Da lei lei, na ka liang jong ngi, ngin ym lah ban pdiang ïa kane ka jingthmu”.
Ula ong, lada pynkylla ïa ka kyrteng jong ka ri India sha ka Bharat, kan dei ruh ka daw bah la ka BJP kan wanphai biang ha ka bor synshar ne kan rem haka elekshon ka ban long ha u snem ban wan.
U President ka KSU u samla Lambokstarwell Marngar ula ong, ba ki dak ki shin ki la sdang ban paw bad na kawei ka snem sha kawei ka snem, kane ka Sokar NDA ba ïalam da ka BJP ka la sdang ban pyndep ïa ki jingthmu kiba ka RSS ka don.
“Ka Ri India kadei kaba kdup ïa kiba bun bah ki jaidbynriew, kiba bun bah ki rukom ngeit, ïa kiba bun bah ki jait ktien bad ki trai riewlum, hynrei ka jingthmu ban pynkylla ïa ka kyrteng India sha ka Bharat ka don ka jingïasnoh bad ka jingngeit niam Hindu bad ka dei kawei na ka thong jongka RSS ban pynbor ïa ka sorkar BJP ba kan pyndep bad ka rukom leh jong ka sorkar BJP, ym lah ban len ba ka long kaba noh beit sha ki Hindu” ong u Lambokstarwell.
“Ha ka kyrteng India ruh, ïa ngi ki thombor beit bad lada ai kyrteng Bharat ruh ïa ngi kin thombor beit, kaba kongsan ïa ngi kum ka seng ka long ba ngi donkam ïa ki aiñ katkum ka riti synshar ka ri ban ïoh ïa ka jingïada, ha kaba ngi la tyrwa ban pyntreikam ïa ka Inner Line Permit (ILP) ban kynthup noh ïa ka ktien Khasi ha ka Khyrnit ba Phra jong ka riti synshar ka ri bad kiwei ki mat kiba ïadei bad ka koit ka khiah, ka pule puthi bad kiwei kiwei” ong u nongïalam ka KSU.
U Bah Robert bad u Bah Dundee ki la ong, ba kam dei kaba suk ban pynkylla ïa ka kyrteng jong ka ri namar ka jinglut jingsep kan poi da ki hajar klur tyngka namar yn hap ban pynkylla noh ïa ka pisa jong ka ri, ki kot ki sla kiba bun jait jong ka sorkar pdeng bad ki sorkar jylla bad kane ka jingthmu kan wanrah pynban ka jingduhnong kaba khraw ïa ka ri baroh kawei.
Ki nongïalam sengbhalang ki la ong, ba kane ka jingthmu kadei kawei na ka sienjam kaba ka seng BJP ka shim ban poi pat sha u pud ban pyrshang pynurlong ïaka jingthmu “One India, One Religion”, “Kawei ka Ri, Kawei ka Niam” bad ka dei ruh ka jingthmu ban pynurlong ïa ka jingthrang jong ka seng shitniam ki Hindu ka RSS.
“Mynta ka pyrshang ban pynkylla ïa ka kyrteng jong ka India sha ka Bharat, hadien kane, kan wanrah ïa ka ‘One India’, ‘One Election’ bad kan pyrshang pat ban wanrah iaka ‘One India’, ‘One Religion’ bad kane ka long kaba i ma kaba ap ïa ngi kum ki jylla kiba ritpaid kiba don ïa la ka jong ka jingngeit” ong u Bah Dundee.
U Nongïalam ka KSU ula ong ba lada ka BJP ka pyrshang ban leh jubor, ka thma pohïing kan sa jia ha kylleng ki jylla jong ka ri ba kin ym lah ban shu nion jubor ïa ki rit ki ria namar ki don ïa ka hok ban im, ka hok ban pynthikna ïa ka jinglong kyrpang ka jongki bad lada ki hehpaid kin shu leh katba mon kan ïalam sha ka lynti kaba mynsaw.
“Nga ïohi tang kane kawei haba nga ïoh ban ïakren bad ki jaidbynriew kiba don ha ka thaiñ shatei lammihngi ba lada kata ka jingthombor ka long marmar ne suki pa suki, lada kum kata ka ïa ka ïai long, uwei u Professor ula dep ban ong, ba ki jaidbynriew ka thaiñ shatei lammihngi ha ka jaka jong u khulom kin sa shim da ka tiar, ha kata ka por ka jingkieng tiar ka dei namar ka jingshah thombor bad ban pynneh ïaka jonglong tynrai jong ka jaidbynriew ka jongki” la pynkut u nongïalam ka KSU.