Lada treikam ka aiñ, ki bar jylla kin duna ban shong die madan

Shillong, Jylliew 23: I Kong Biolin Pyrtuh, President jong ka Meghalaya & Greater Shillong Progressive Hawkers and Street Vendors Association, kaba dei ka Seng jong ki nongdie jingdie ha madan, i la ong ba ka jingkynnoh ba dei ma ki, kiba ailad ïa ki bar jylla ban shong die jingdie ha madan ka long ka bym don nongrim satia, hynrei dei ka sorkar kaba ailad ïa ki, namar ba kam shym la pyntreikam satia ïa ka aiñ jong ki nongdie jingdie madan.
Haba ïakren bad ka kynhun ki nongthoh khubor hadien ka jingrakhe ïa ka jingdap hynriew snem jong ka Seng, i Kong Biolin, iba shong die jingdie ha Khyndailad, i la ong ba ka jingbym pyntreikam ka sorkar jylla ïa ka aiñ jong ka sorkar pdeng, ka ailad ïa kiba nabar ban wan shong katba mon bad na ka liang jong ki kim don bor eiei namar kidei tang ki nongdie jingdie.
Ha kajuh ka por, i la kynnoh ruh ba ka jingbym treikam ïa ka Trading License na ka bynta jong kine kiba nabar jylla ban shong die ha madan, kadei kawei na ki daw ba sa khapngiah ki lynti ki syngkien da ki nongdie madan.
Ha kaba ïadei bad ki nongdie madan ha Khyndailad, i Kong Biolin, i la ong ba kane ka jaka kam hap hapoh ka jingpeit jingkhmih jong ka District Council, hynrei lada pyntreikam ïa ka aiñ pat kan teh lakam ïa kiba nabar. Nalorkata ruh lada pyntreikam ïa ka aiñ, kiba shong die jingdie ha madan, ki hap ban rejistar bad hap ïoh laisen na ka sorkar bad kane kan lah ban teh lakam ban shu ïa shong die jingdie katba mon ha madan.
Halor ka jingkynnoh ba ki nongïalam ka Seng ki ïoh pisa na ki nongdie madan, ine i longkmie, i la ong ba kadei ka jingong kaba shu jler, namar kum ka Seng ki ju lum 10 tyngka shi bnai na ki nongdie madan na ka bynta ki jingdonkam jong ka Seng, kum ha kaba pynbiang ïa ki kot ki sla, ki jingïalang bad kiwei kiwei de ki jingdonkam.
I la ong ba kine ki jingkynnoh ki mih namar ba bun na ki nongdie madan kidei kiba duk, kiba kamai mynsngi bam da miet, kiba ym don por satia ban ïapynphai kylla ïa kine ki jingshah kynnoh.