U Myntri Rangbah ka jylla, u Conrad Sangma, dang shen u la pyllait paidbah ïa ka skhim kaba la ai kyrteng CM Elevate, kaba dei ka skhim kaba ai ryngkat bad ka Subsidy na ka skhim jingïarap pisa lang na ka sorkar bad kaba sei hi nalade ban leh ïa kino ki kam ban ïeng ha la ki jong ki kjat. Ka subsidy ka long haduh 75%, nangta kiba 50% bad don ruh kiba 35%.
Kane ka skhim ka long ban treikam ha kiba bun ki bynta jong ka jingtreikam, naduh ki kam tourism, kam seng karkhana, ri jing ri, seng dukan bad kiwei kiwei de. Kiba bun ki briew ki la dap da ka jingkmen bad shim ïa aaplication form na ka bynta ban aplai ban ïoh ïa kine ki lad jingïarap na ka sorkar da ka jingkhmih lynti ba kin ïoh jingïarap lyngba kane ka skhim na ka sorkar jylla. Ka long ruh ka jingshisha ba lada kine ki shkim kiba la pynbna da ka sorkar ki treikam bha bad kiba aplai ïa kine ki skhim ki ïoh baroh kiba dei hok ban ïoh, kan jin da la long ka jingkyrkhu kaba khraw ïa ki paidbah jong ka jylla, khamtam lei lei na ka bynta kito kiba thmu shisha ban ïeng ha la ki jong ki kjat.
Hynrei kiba bun ki la pynpaw ruh ka jingsngew artatien, la kane ka skhim kan treikam bha ne em, ne kiba aplai ban ïoh ïa kane ka skhim kin ïoh ne em katkum ka jingkwah bad ka jingangnud jong ki.
Kiba bun ki paidbah kiba la ïoh ban ïakren ki la pynpaw ïa ka daw balei ba ki artatien ïa kane ka skhim. Ka daw kaba ki la ai kadei da kaba ai nuksa ïa ka skhim FOCUS bad FOCUS + ne ka FOCUS PLUS.
Ka Skhim FOCUS kadei ka skim kaba la pynmih da ka sorkar jylla ha ka snem 2021 ha kaba la mang ban ai sha ki nongrep lyngba kita ki Producer’s Group kiba dei ki kynhun ba la thaw da ki nongrep. Ka jingmang ka sorkar ka long ban ai jingïarap mar san hajar tyngka iwei iwei i dkhot jong ki Producer’s Group. Ha ka snem 2022 shi snem shuwa ka elekshon MLA, u Myntri Rangbah u la pynbna sa ïa ka FOCUS +, kaba long ka jingbteng ïa ka FOCUS.
Hynrei kiba bun ki dkhot jong kine ki Group ki la ïathuh ba ki la seng ïa ki Group jong ki naduh u 2021 bad la pynbiang lut ïa ki jingdonkam,pynban kim shym la ïoh satia ïa kata ka san hajar tyngka wat haduh mynta. Kane ka skhim ka la wanrah ruh ka jingkawang ktieh hapdeng ka Seng UDP bad ka Seng NPP, ha kaba ki don ki nongïalam ka UDP kiba la kynnoh ba ka NPP ka la pyndonkam ïa kane ka skhim kum ka jingpynbieit elekshon jong ka ïa ki paidbah da kaba pan ïa ki Passbook, ki EPIC na ka bynta ban pynrung kyrteng bad phah pisa ha ki jingkynshew pisa jong ki ha ki Bank. Hynrei ki Minister ka UDP ki la kam pat ba kadei ka skhim kaba la dang lang da ka sorkar, ym dei tang jong ka NPP. Ka Seng BJP ruh ka la ther tyngeh da kaba ong ba kadei ka skhim jong ka NPP bad sam ruh tang sha ki nongkyrshan jong ka NPP ha ka elekshon baladep. Ka BJP lei lei ka la kynnoh ba kane kam dei ka skhim, hynrei ka ram ïa kaba ki paidbah kin hap ban siew hadien.
Ym tang ka skhim Producer’s Group, kiba bun ruh ki la pynpaw ba wat ka YESS Scheme ruh kaba la ai da ka tnad Sports and Youth Affairs, kiba bun kiba la aplai hynrei kim shym la ïoh satia. Kane ka skhim kadei kaba la mang haduh 1 lak tyngka na ka bynta ki Sports Club, ki Youth Club ba kin pynlong ki prokram bapher bapher kiba ïadei bad ki Samla. Pynban kiba bun kiba aplai ki la ïathuh ba kim shym la ïoh satia.
Dei namar kane ka daw ba kiba bun mynta ki la pynpaw ka jingartatien ïa kane ka skhim CM Elevate ruh, khamtam haba la pynbna ne pyntreikam satang khyndiat bnai shuwa ban long ka elekshon, la ka long ka elekshon jied MDC ne ka elekshon jied MP sha Lok Sabha.
Hynrei na ka bynta u paidbah hi um tip mao ba sdang mano ba donkti ban wanrah ne pyntreikam ïa ki skhim pynroi, hynrei kaei kaba u kwah ka long ba ka skhim kadei ban treikam beit ha ka lynti kaba khuid kaba suba kaba khlem da ïashah shiliang ïano ïano ruh, hynrei kadei ban treikam beit na ka bynta u paidbah salondar jong ka jylla uba angnud ban seng kam seng jam lyngba ki skhim bapher bapher ba la wanrah da ki bor sorkar.
