Shillong, Naitung 06 : Ka Dorbar Lyiur jong ka KHADC ha kane ka sngi Balang ka la byrngem ban ujor noh sha ka Ministry of Finance jong ka Sorkar Pdeng pyrshah ïa ka sorkar jylla namar ka jingpynslem jong ka ban pyllait noh ïa ka pisa ba la mang khnang da ka sorkar pdeng na ka bynta ki projek kiba ïadei bad ka koit ka khiah bad ka khuid ka suba ha u pud u sam jong ka Council.
“Haduh mynta ka sorkar jylla haduh mynta kam pat pyllait ïa kane ka pisa watla na ka liang ka Executive Committee ka la leit ban kynduh ïa u Myntri Rangbah ka jylla uba la kular ban pyllait noh ïa kane. Imat don katto katne kiba pyrshang ban ïalam bakla ha ka jingpyntreikam ïa kane ka pisa,” ong u CEM, Bah Titos W Chyne haba jubab halor ka jingkylli ba wanrah da u MDC ka Mawkyrwat, Bah Carnes Sohshang.
U CEM u ong ruh ba ïa katei ka pisa hi yn ym lah satia ban pynbakla lynti shano shano. “Ha ka jingshisha ngi la kwah ban pyntip noh sha ka Ministry bad ka ladei ka por ba ngin pyntip noh sha Delhi ba ngim pat ïoh ïa kane ka pisa haduh mynta ruh. Nga ong da kaba shai ruh ba lada ka sorkar ka pyllait ïa ka pisa ka hap ban pyllait ruh bad ka sut. Nga kyrpad ïa ki para dkhot baroh ban ïai shah bad ba ka EC ka shimkhia ban buddien ïa kane ka kam ryngkat u Deputy Chief Executive Member ba dei peit ïa ka Pla-tyngka jong ka Council ba la kumno kumno ha kine ki khyndiat sngi ne khyndiat taiew ka sorkar kan pyllait noh,” u la ong.
U ong ruh ba na ka liang ka EC ka pynkhreh ruh ban leit kynduh biang sa shisien pat ïa u Myntri Rangbah ban pynkynmaw biang halor katei ka bhah kaba la mang khnang da ka sorkar pdeng.
Na ka liang u Nongïalam ka Liang Pyrshah, Bah PN Syiem u la buh jingkylli ruh ïa ka EC ba kaei pat ka sienjam ba khatduh ba kin shim lada ka sorkar jylla kam pyllait wat hadien ba ki la dep ban thoh sha ka Ministry ruh. “Kaei ka sienjam kaba khatduh ba ka EC kan shim lada jia baka sorkar kam pyllait hato kan wad noh da kiwei kiwei ki lad ne khnang baka sorkar kan pyllait?”
Halor kane, na ka liang u CEM u la ong, “Na ka sorkar ngi la shimkhia bad ka sorkar jylla hi kan sa sngap hadien ba ngi thoh sha ka Ministry namar dang ha kine ki khyndiat taiew ruh ngi dang dep ïa kren bad ka Ministry.”
U CEM u kyntu ruh ïa ki MDC ba kin smat na ka bynta ki skim ba la ai ban pyndep noh ha ka por kaba biang namar tang ban submit ïa ki skim ruh shimpor da ki snem wat hadien ba buh 30 sngi ban phah kumta kane ka ktah wat ban phah ïa ki Utilization Certificate.
