Nongpoh, Naitung 28 : Ka seng Ri-Bhoi Youth Federation, sengkmie mynta ka janmiet kala shong da ka jingïalang ban shim rai ha kaba ïadei bad ka jingioh bynta ki paidbah ïa u khaw rashon bad ka jingbym pynthymmai ka sorkar ban lum ïaka khana samari (Census) naduh u snem 2011.
Haba kren sha ki lad pathai khubor naka liang u Bah Bipul Thangkhiew President ka RBYF haka jingdonlang u Bah Kynsai Nengnong General Secretary lem bad kiwei kiwei ki nongïalam, u la ong ba naka liang ka sorkar India haduh kine ki sngi kam shym la shim ïakano kano ka khana samari kaba thymmai hadien u snem 2011, watla man ka 10 snem dei ban don ka Socio Economic Census ne ka jinglum khana samari kaba thymmai.
U la ong ruh hadien ka jingpyntreikam ïaka National Food Security Act, 2013 bun tylli ki longiing kila ioh ka jingmyntoi kaba khraw lyngba ka jingsam ïa u khaw rashon haki 3 bynta ba kynthup ïa ki longiing ba ioh ïaka Card Non-PHH, PHH bad AAY.
“Balei ka pynlong ïaka RBYF ban kren halor kane ka mat namar kat dang mih ki snem naduh u 2011 watla bun ki longiing ki ioh jingmyntoi na u khaw rashon hadien ba pyntreikam ïa katei ka aiñ, hynrei hadien ka jingleh ïaki Bio-Metric, bad lada don kino kino kiba la khlad noh na kane ka sla pyrthei dei ban pyntip sha u DC Supply bad la shim ruh ïaka rai ban pynduh noh ïaka jingioh jingmyntoi ban ioh ïa u khaw, hynrei kaba lyngngoh pat ïa kiba dang kha thymmai kam shym don kano kano ka jingpynrung kyrteng thymmai” la ong u Bah Bipul.
Shuh shuh ka seng kala ong ruh ba ka sorkar kam dei ban pynduh bad pynduna ïaka jingioh khaw jong ka shnong watla don kiba khlad noh hynrei ban dei ban neh kajuh ka bynta sha kato ka shnong ban ioh jingmyntoi bad ban ioh pat ban aiti sha kiwei ki longiing kiba donkam, namar ban shu kheiñ jingkheiñ tang ïa kiba la khlad noh ka long kaei kaei ka bym lah ban pdiang, hynrei dei ban pynrung ruh ïa kiba dang thymmai bad ki bym don haka list bad khana samari jong u snem 2011.
“Ïa mynta ka sorkar ka lah ban ai daw ba kam pat shim ïaka khana samari kaba thymmai bad lada ka long kumta wat ïaki iing kiba la don kiba khlad noh ym dei ban pynduh namar ym pat leh ïaka census thymmai, namar lada ka sorkar ka lah ban pynduh ïa kiba la khlad noh, Balei pat kam lah ban ai ïakiba dang kha bad dang mih iing thymmai? La bynrap u bah Bipul.
Ha kaba ïadei bad kito kiba la aiti noh ïaki card rashon namar ba kila don kiba trei kam sorkar bad kumta ter ter, ïaka hok jong kito ki longiing dei ban ioh kajuh hi ka shnong bad ban aiti pat sha kiwei ki longiing kiba donkam.
Halor kane ka bynta naka liang ka RBYF kala kyrpad ïa u DC ba u dei ban shimkhia ïa kane ka kam bad kum ka seng kan sa leit ruh ban buh da ka jingthoh lashai ka sngi ban dawa ba u dei ban shimkhia mardor ïa kane ka kam.
