Lada phi jied ïa u kyrtong ka NPP, phin ïoh arshah ki jingmyntoi, ong u Bah Sniawbhalang

Shillong, Rymphang 15: U National secretary ka NPP bad u Symbud Myntri Rangbah ka jylla u Bah Sniawbhalang Dhar ha ka sngi saitjaiñ u la kyrpad ïa ki paidbah ka shnong Mansngat-Khanduli constituency ban vote na ka bynta u kyrtong ka seng u Pheinchwa Nanglein ha kane ka elekshon sha ka JHADC, khnang ba kin ïoh ki jingmyntoi kiba long arshah ne na ka double-engine government.
Haba kren ha ka jingïalap elekshon hapoh ka shnong Mynsngat, u Bah Dhar u la pynthikna ba hadien ka election, un sa sdang ban shna ïa ki surok ha kiba bun ki constituency.
Haba ong ba kane ka shnong ka dei kaba ju ai ka jingkyrshan ïa ka NPP, u Bah Dhar u la ong, “Kumno phin ai ka jingkyrshan ïa kiwei ki kyrtong haba ka Nartiang constituency ka dei shi bynta jong ka sorkar. Namar kata nga kyntu ba phim dei ban shah ïalam bakla da kiwei ki party namar lada u kyrtong jong ngi u shah jied lah thikna ba phin ïoh bun ki jingmyntoi na kane ka double engine government.”
“Ka biang lada kiwei ki kyrtong ki ïalap elekshon, ki don ruh ki briew kiba ong ba kim pyrshah ïa ka VPP bad kiwei ki party hynrei kin pynthikna ba ka NPP kan ïoh ïa ka jingjop ha kane ka constituency,” u la ong da kaba bynrap, “Kane ka long namar wat hapdeng ki jingpyrshang kiba bun jong kiwei ki party, ki khun jong nga ki tip ba ki kam niam ha kane ka kynti kaba mynta kan ym treikam satia ha ka saiñ hima sima. Ka Politic ka dei ka politic bad ka niam ka sah hi ka niam, ngim donkam ban khleh lang ïa kine ki artylli”.
Shuh shuh u Bah Dhar u la pynthikna ba un ïai bteng ban trei na ka bynta ka roi ka san jong ka constituency hi baroh kawei.